Despues de estar invierno entero en kaza enserrados, vinir a la kampanya me vino komo milizina. Asigun abashi del motoriko, ya vide djente ke no aviya visto durante mezes. Sera vedra ver djente biva i avlar kara kon kara. Entri al charshi; los vendedores ya me aresivieron kon kara riyente, me demandaron hatir. Por siguro ke estan kontentes de los klientes del enverano porke asigun vinimos, de vista pujan los presios! Digamos en la Büyükada todo esta de baldes. Echar un torniko en la skala te kosta al pato.A todo esto dakordo, solo vere djente biva i konosidos. Bendicho el Dio, este anyo ya se avryo i los djugos en Anadolu Klub, de sorte ke mos estamos viendo kada dia kon las amigas. Solo este anyo, entrar a la mar no ay; ee, ke se aze, todo djusto no ay!
Asigun pasimos a la vida normal i mi puevlo paso a su vida normal. Syertas personas komo si no uvo nada ande las deshi, aya las topi. De vista ya empesaron ken paso, ken torno, ken kazo, ken se kito, ken se aflako, ken se engodro (digamos este anyo no uvo ken se aflake!) i siguro spekulasyones de politika, todas ministras de estado.
Este anyo en la plaj el sujeto muevo es la mar de Marmara i el musilaj. No se entra, si se entra, ay kolera, no komash peshkado, la ke disho un diya antes por sedaka no entres a la mar se echo de kavesa i travo un oh ke esta muy ermozo; otra disho otros vente anyos no vamos a pueder entrar a la mar, yo le demandi kuantos anyos tyene? Me disho 83, le dishe munchos i Buenos.
La semana pasada fue semana de vakuna “BIONTECH”.
Apenas salyo la notisya en la televizyon de vista sanos ke esten mi puevlo, no kedo telefones, whatsapp, messenger, facebook, instagram etc. Den boka en boka no uvo ken no lo supo. Todos koryeron al ospital. Yo komo moro enfrente el ospital, vyernes demanyana me paresyo ke ay revolusyon. Era de ver la djentorya entrando de la puerta del ospital, paresiya salida de Misrayim. Aryento otro filmo, en asperando el torno, porke era a sesh a sesh ke estavan tomando, ken gritando ke le tomaron el torno, ken se kere vakunar kon su mujer i siguro la mosa, ken kere alkansar al djugo i ken va gizar por shabat. Komo semos un poko eksplosivos, ya les tomimos el meoyo de los doktores, ma alegrimos la sala de asperar.
En asperando vide en un bankito esta asentado el haham de la keila de la ada asperando su torno. Lo saludi, le demandi komo esta me disho ke:
--- De agora en delantre la tefila la va azer en el ospital.
--- En el ospital????
---- Si hanum, en el kal no esto topando minyan, aki puedo azer tres tefilas!
Muy kerido mi puevlo!!! Ke bivas i lo ke kere ke seyas. Syempre mos toparemos endjuntos sanos i bivos!
