Süzet Herman
Keridos lektores, mirá lo ke me vino a la idea.
Unas kuantas kreaturas estavan djugando en la mar. Alegres i kontentes de nadar. Jakito el avagarozo, se aserko de eyos. I se namoro de ver la manera ande los ijikos estan djugando. Los ijikos le disheron "Jak ven i tu".
Jak les respondiyo kon una boz flaka; "si ya va vinir i yo asperáme".
Jak vino a kaza, se metyo el mayo, tomo el simit, el chapeyo i las paletas i avagarozamente se hue a la plaj. I ke ve: los ijikos estan djugando kon la inyeve. Fina ke Jakito arivo a la plaj, la sezon troko! Los ijikos le disheron, "Jak ven a djugar kon la inyeve".
Jak les disho kon una boz flaka, "asperáme ya esto vinyendo".
Jakito se hue a su kaza. Se kito las ropas de enverano, i ampeso a vistirse de invireno. Se metyo bluza godra, jaketa, chapeyo de lana, botes, guantes avagarozamente, se metyo en kamino para irse alado de sus amigos. I ke ve, los amigos ya se vistyeron mas livyanos porke la sezon ya troko, i estan djugando a la bala.
Keridos amigos, no tardesh de bivir el momento. La vida es kurta. El tiempo esta pasando muy presto. Gozá del momento. Deshá de teshervos!
