El otro diya meldi en e linternet, en un sitio de judeo-espanyol avlantes, ke estavan demandando por fleshes i furketas. Un miembro de este sitio disho ke su nona se aziya una kurula i la deteniya kon furketas.
Kon el tiempo, troka la moda de las vistimientas i tanbien de las kuafures. Me akodro ke en los anyos 1960 era la moda de azer kaveyos “karavel” … todas las mansevikas mos ivamos al kuafor, mos mojavan los kaveyos kon bira, mos metiyan bigudis i un file ensima, dos kapakes a las orejas i mos entravan al seshuar, ke era komo una kaldera grande ke asoplava ayre kayente para ke se seken los kaveyos una ora mas presto. Despues de medya ora, mos kitavan los bigudis i los kaveyos los peynavan de la punta para el kök para ke se embrolyen bueno i ke keden auflados i mos metiyan un sprey ke akel tiempo se fabrikava kon la rechina de los arvoles. Ya vos imajinash ke los kaveyos se aziyan komo tavlas. I la fin deshavan las puntas para afuera komo las alas de aviones. Todas las mansevikas kon los kaveyos mizmos, estavamos kon guste grande.
Despues salio la moda de shinyones a la moda de Farah Diba, la reyna de Iran. Ken i ken se va azer el shinyon mas riko. Yo ya teniya munchos kaveyos, malgrado esto me akodro ke para adjustar, me aviya merkado i unos kaveyos kuzidos a un peyne para ke el shinyon se veya mas riko. El kuafor mos metiya fleshes i fleshes, i furketas i furketas. Dizeremos ke mos fuimos a una boda, i tornimos a las una de la noche a kaza. Kaliya bozdeyar el shinyon porke no se puediya meter la kavesa ensima el kavesal. Se kitava las fleshes i las furketas ke no eskapavan, en medya ora. O, aviya otro chare, durmir de boka abasho.
Unos anyos despues, salyo la moda de los kaveyos de Jeanne Seberg… Todas ampesaron a kortarsen los kaveyos, kurtikos kurtikos. Salyo tanbien la moda de kaveyos afro ke era los kaveyos komo los afrikanos, ingridos i sin peynar.
Ansin kontinuo i va kontinuar la moda de todo. Mizmo los ombres tyenen modas de kaveyos. Un tyempo se deshavan los kaveyos largos, mas antes se kortavan los kaveyos “flat-top” ke era el stilo de los soldados amerikanos.
I agora kon la pandemiya de la corona, muncha djente se espanta de irsen a los kuafores, se deshan los kaveyos natural. Ke eskape este virus i veremos ke moda mueva va salir.
