Segun un artikolo ke meldi en la prensa, los judios azen el 0,2% de la populasion mondial, ma por kontra, el 54% de los shampiones de ajedrez; el 27% de los ganadores del premio Nobel de Fizika; el 37% de los ganadores de diversos premios de medisina.
Los judios azen el 2% de la populasion de los Estados Unidos, ma de mezmo, el 26% de la lista de onor del Kennedy Center; el 37% de los direktores ganadores de premios akademikos; el 38% de la lista de los prensipales filantropistos, i el 51% de los ganadores del Premio Pulitzer.
En su livro ‘The Golden Age of Jewish Achievement’, Steven L. Pease esta diziendo ke la kreensia de los judios en el progreso i en la responsabilidad personal, es una de las razones de sus adelantamientos.
En la Edad Media, la majoritad de los judios fueron ovligados de abandonar la agrikultura. Por esta razon, sus desendientes fueron ovligados de bivir en empleyando sus meoyos. Munchas vezes, emigraron de un pais al otro. Estos judios profitaron de la kreatividad de los paizes ande bivieron.
Es verdad ke no se puede topar una sola eksplikasion por la reushitad de los judios. Puedemos sitar munchas razones por esto. Si analizamos la istoria, vemos ke por munchos anyos, los judios de la Diaspora fueron mas adelantados de los judios de Israel. Los israelianos no tuvieron tiempo; eyos fueron ovligados a dedikar sus enerjias a las gerras i a la politika.
Ma, en los anyos dalkavo, esto troko kon las reformas ekonomikas en Israel. La emigrasion de un milion de rusos, i el empesijo del ‘proseso de pas’, kavzaron un trokamiento istoriko en Israel. Ansi, los israelianos empesaron a entrar a la teknolojia, i al komerso. Esto izo un efekto muy grande en el adelantamiento, i en la ekonomia del paiz.
Tel Aviv se konvertio en uno de los mas emportantes sentros enterpretores del mundo entero. Israel tiene la mas alta mueva teknolojia del mundo entero. En mezmo tiempo, Israel es el lider mondial en la investigasion, i en el developamiento sientifiko. El butche apartado por estas investigasiones es muy grande. Israel okupa el sigundo lugar en el mundo entero, en la lista de kompanyias en el Nastaq.
Komo Shaul Singer eskrivio en su livro ‘Start up Nation’, la istoria de Israel es la istoria de un mirakolo ekonomiko. Los israelianos ke son ‘obsesivos de la mueva teknolojia’ estan lavorando en kolaborasion, i se mantienen de las ideas de unos a los otros.
Segun los obzervatores, Israel se va konvertir al Hong Kong del Medio Oriente, i va prokurar benefisios ekonomikos al mundo arabo. Ma el salto ekonomiko de Israel, va ogmentar la distansia kon sus vizinos. Todos los paizes de la rejion estan avlando sovre ‘enkorajar las novedades en sus paizes’. Estos paizes rikos de petrol, estan gastando miliones de dolares para estableser sentros de teknolojia. Ma los paizes arabos no tienen la tradision de interkambio entelektual i del interkambio de kreatividad teknika, komo Israel lo aze kon otros paizes. Por egzempio, entre los anyos 1980 i 2000, los ejipsianos rejistraron 77 patentes en los Estados Unidos, los suudi arabos rejistraron 171 patentes, los israelianos rejistraron 7.652 patentes.
Del espanto si un diya Iran echa una bomba nuklear a Israel, los israelianos estan en kontakto kon los judios amerikanos, para pueder salvar la ekonomia del paiz.
