Malorozamente esta semana se kemaron las sharas del Sud de la Turkiya. Unos fuegos tan grandes ke no se tiene visto asta agora. Durante una semana las brazas estuvieron saltando de un lugar al otro en engrutyendo las moradas i los kazales endjuntos. Munchas famiyas se kedaron sin kazas. Del Dio ke es enverano i se pudyeron echar en las guertas. Poveretos de los animales se kemaron bivos bivos en no puedyendo salvarsen de esta gezera. Se kemo la natura, se kemaron los nidos en los arvoles, se kemaron las bizbas, se kemaron las flores ke las bizbas kitavan sumo para la miel, los papiyones, las kulevras, los guzanos, en kurto todo se izo sal i siniza. En las televizyones i en las gazetas vimos unas fotografiyas ke mos kemaron los korasones. Los aviyones, los helikopteres, la djente de los kazales, la djente de otras sivdades, todos vinieron a ayudar a amatar a este fuego ma malorozamente no se pudo amatar presto porke el ayre estava ayudando al fuego. El ayre estava asoplando kon una fuersa de 60 km a la ora. Ma no estava asoplando en la mizma direksyon. Estava asoplando para una direksyon estava kemando aya, despues asoplava por otra direksyon i estava kemando por aya, komo lo mas de los arvoles eran pinos, las pinyas kemando, estavan saltando komo bombas, i los arvoles de azitunas ke tienen la tavla yagli, estavan kemando komo chiras, de sorte ke no se estava puedyendo intervenir komo se deve.
Este fuego mos amostro lo ke es la solidaridad. Riko o prove, kada uno ayudo asigun su poder. Ken yevo aguas, ken yevo jeneratores, ken avriyo su kaza, ken merko kamas. Las asosyasyones mandaron kamyones de komanya. De todas las partes de la Turkiya puedo dizir koryeron komo luvyas, materiales de modos i modos. Kuras, inguentes para kemaduras, guantes i kalsados ke no se keman, panyales para los bebes, leches, piles.
Esto me izo akodrar lo ke me kontava mi granpapa, de los fuegos de su chikes. No se de ke razon diziyan antes ke en el tiempo ke sale la berenjena, los fuegos pujan. Komo antes todas las kazas eran de tavlas, kuando ampesava fuego en una kaza, saltava de una kaza a la otra i ansina se kemavan maalles enteras. Mi granpapa kuando era chiko se les aviya kemado sus kaza de 3 etajes en el fuego famozo de Hasköy. En un diya se aviyan kedado sin morada i solo kon los vistidos ke vistiyan. Kada una famiya se aviya refujiado ande un paryente.
Un otro rekuerdo es el fuego de Salonik. Mi esfuegro i mi esfuegra todos los dos nasidos aya, teniyan komo 8 anyos kuando uvo el fuego famozo de Salonik. I akel tiempo uvo dezgrasyas naturalmente. I eyos se kedaron kon los vistidos de ensima. I eyos se refujiaron ande sus serkanos. Ken vino a Estambol, ken se fue al Ejipto i ken se kijo fuyir a la Evropa. Estos ke se kijeron fuyir a la Evropa se suvyeron a los vapores i en medyo del kamino fueron bombardeados por los enemigos i famiyas enteras se kayeron al dip de la mar. Ke dezgrasyas.
El Dio ke mos guadre, de lo ke no mos puedemos guadrar. Amen.
