Para uno ke no pudo eskapar la eskola segundarya i ke fue ovligado de repetar tres vezes la leson de Inglez, Leon Uris tuvo una karyera grandioza komo eskrivano de best-sellers. Uris, nasido en Baltimore, el 3 de Agosto de 1924, era ijo de un boyadji de Polonya, Wolf William, ke aviya emigrado a los Estados Unidos despues de pasar un anyo en la Palestina. La madre de Uris, Anna Blumberg, era de orijin Rusa. William aviya tomado la alkunya Uris enspirado de Yerushalayim. Es de saver ke su ermano aviya tomado la alkunya Yerushalmi.
Uris entro a la armada, a la Infanteriya Marina, a los 17 anyos, un poko antes del bombardamiento de Pearl Harbor. Su servisyo militar komo operator de radio en el Pasifiko del Sud fue la baza de su primera novela, Grito de Bataya (Battle Cry), ke fue publikado en 1953, anyos despues de su demobilizasyon de la armada i lavoro en el departamento de distribusyon de una gazeta. Battle Cry estuvo en la lista de los mas munchos vendidos durante un anyo i fue arrevatado por Hollywood, ande Uris eskrivyo el senaryo.
Exodus (1958), la novela la mas famoza de Uris, fue eskrita despues de mezes de investigasyones. Es la istorya del retorno del puevlo djudio a la Tyerra de Israel, sentrado en la dramatika istorya del barko de refujyados "Exodus". Tanto el livro komo el filmo, tuvyeron una reushita inkreivle.
Si bien Uris eskrivyo sovre una variedad de temas - la Segunda Guerra Mundial en Gresya, el konflikto en Irlanda, etc., el Olokosto i el Estado de Israel fueron temas muy importantes en su vida de eskrivano. Su reushita de vendidas, su best-seller de 1961, Mila 18, es sovre el alevantamyento eroiko i triste de los Djudios en el Ghetto de Varsovia. Torno a un tema relasyonado kon el Olokosto en 1970 kon QB VII, una drama judisyal sovre un kavzo de difamasyon, ke salyo en medyo, los orivles aktos de un ex-nazi fuido. El Haj (The Haj - 1984) prezento la vizyon de Uris de la perspektiva de los Palestinyanos de los eventos ke bivyeron en 1948, i Mitla Pass (1988) eksploro la kampanya del Sinay de 1956.
Uris fue un eskrivano afamado ke kontinuo produsyendo novelas populares durante toda su vida de eskrivano. Su livro de alkavo, O'Hara's Choice, (livro sovre los problemas ke enkontraron el U.S. Marine Corps despues de la Gerra Sivil), se publiko en 2003, unos pokos mezes antes de su muerte a la edad de 78 anyos, en el 23 Junyo 2003.
