La perasha Shofetim enpesa kon los biervos sigientes: Djuezes i alguaziles te pondras en todas tus sivdades ke el Kriyador, tu Dyo, te da en tus trivos, i djuzgaron al puevlo kon djuisyo djusto. Shelomo Ameleh, en el livro Mishle, dize: los kaminos de la Tora son ermozos i nos amostran a nozotros bivir en paz. Los kaminos de la Tora realizan la paz. El mundo se kriyo kon paz. El Kriyador kriyo el mundo kon agua i fuego. Komo puede ser dos kozas una kontra de otra, la agua i el fuego ke esten endjuntos? De aki entendemos la grandeza del Kriyador, la enportansa ke da a la paz, a dos kozas ke son kontra de una a otra las adjunto i formo el mundo; kere dizir el mundo es sostenido sovre el simyento de la paz. El Kriyador aze la paz i no la manda de las alturaz. Tambien el nombre del Kriyador es “Shalom”: paz. La Tora nos trae a nozotros la paz. La persona ke se entremete en el estudyo de la Tora, kompra sanedad a su kuerpo i a su alma. Komo lo disho David Ameleh en el livro de Teilim, la ley ke nos dyo el Kriyador es prinismo i aze arebivir la alma de la persona.
La misyon de los djuezes es de realizar la paz entre la djente. Komo meldamos en el livro Pirke Avot, el mundo se sostyene sovre las verdades, sovre el djuisyo i sovre la paz. Si no ay djuisyo, no egziste repozo en el mundo.
Una enkomendansa muy sakra meldamos en la perasha de esta semana.
Vas a ser prinizmo kon el Kriyador. “Kon el Kriyador” kere dizir la kreyensa, i la esperansa, solamente vas a tener en el Kriyador. El te va salvar, el te va ayudar en todo lo ke esperas i lo ke dezeyas. La manera ke estas avlando deves de pensar. No es del todo derecho de pensar una manera i avlar de otra manera. El korason i la boka deven de estar mismo.
