El arte i la pintura. Ay kreo mas de un anyo i medyo ke los artistos de pintura no estan reushendo a organizar muevas ekspozisiones. Un syerto tyempo, todo modo de galerias estavan serradas i todas las ekspozisypones fueron anuladas para ser realizadas en otras datas. En el empesijo no era problem. Ma en una epoka de mas de un anyo no era mas posivle de trokar las datas de las ekspozisyones.
Mizmo en el Muzeo Djudio tenemos dos ekspozisyones ke tyenen una grande emportansa para mozotros. La primera va ser realizada en la guerta de la Sinagoga de Ahrida. El prezidente de la Fondasion de Ahrida mos dio apoyo achetando ke esta ekspozision se realize a la fin del mez de septembre i ke sea avyerta asta la fin del mez de Oktubre. Esto va ser una grande okazion para los Estanbullis, para los Turkos i para los turistos para vijitar la ekspozision de las Sinagogas de Turkiya, fotografias del famozo İzzet Keribar. Ya savesh ke anyos antes un livro de dos volumes fue publikado sovre las Sinagogas d’Estanbol i las Sinagogas de Anatolia i Trakya. Las istorias de estas sinagogas fueron eskritas por Naim Güleryüz. Esto va ser la segunda edision. El livro va ser publikado este mez. Ma komo en el mez de Septembre tenemos todas las fiestas komo Roshashana, Kipur, Sukot… no es posivle de organizar una ekspozision. Kreo ke munchos grupos van a kerer vijitar la ekspozision i la Sinagoga de Ahrida. Vamos a avlar kon los dirijentes de Balat para pueder azer vijitar i la Sinagoga de Yanbol. Kreo ke Ahrida i Yanbol son las dos emportantes sinagogas istorikas para la istoria Djudia d’Estanbol.
Keremos ke syertos mansevos sean edukados para ser gias de esta vijita. Vamos a ver si vamos a pueder realizar lo ke dezeamos.
La segunda ekspozisyon se va realizar los primeros diyas del mez de Novembre en la Sinagoga Zulfaris ke no fonksyona mas komo sinagoga. El sujeto de esta ekspozision va ser “Las Trasas Djudias en los Sitios Arkeolojikos”. Es un sujeto muy enteresante. I a la grande partida de la djente, mizmo syertos Djudios, les parese ke la istoria de los Djudios en las tyerras Turkas (Estanbol, Anatolia i Trakya) empesa despues de la engizision Espanyola, ma esto no es djusto, i la istoria de los Djudios en las tierras de Anatolia empesa uno o dos siglos antes de Jesuskristo. I kreo ke vamos emplear syertos elementos de esta ekspozision en el muzeo. Espero ke vamos alkansar a publikar un livro sovre esta ekspozision.
En empesando mi artikolo estava pensando ke los pintores no estan puedyendo ganar paras. I estava pensando en las difikultades ke estan bivyendo. En la Büyükada, en el Klub Anadolu, en enverano kada semana se organiza una ekspozision de pintura. Syertos son artistos profesioneles i syertos mas amatores. El anyo pasado no se realizo dinguna aktivitad. Ay tres semanas ke dishe al direktor: estamos durmyendo; puedemos empesar a organizar ekspozisiones i empesimos. Todos estavan prontos para ekspozar sus ovras. Reelmente es un plazer de ver i mizmo de merkar una ovra artistika. Bendichas manos a los ke realizan estas maraviyas.
