Abraham de Kamondo, el reprezentante de la komunidad judiya de Estambol, entre los anyos 1785-1873, era un myembro de los filantropos i grandes finansyeros Kamondos de orijen espano-portugez.
Abraham de Kamondo fue nombrado komo ‘El Rotschild del Este’, ‘El Grande Kapitalisto’ i ‘El Grande Ofisye'. Kamondo egzerso una grande enfluensya en la Korte de los Sultanes Abdulmedjid i Abdulaziz, i reusho a obtener un Ferman para los non-muzulmanos, dandoles la permisyon de konstruir kazas en el baryo Pera, en Estambol.
Abraham i su ermano, Izak fondaron una banka kon el nombre ‘I. Camondo & Cie’. Esta banka finanso el Imperyo Otomano en la Gerra Krimea entre los anyos 1853-1856.
En el anyo 1830, Abraham de Kamondo se izo el reprezentante de la komunidad judiya de Estambol i fondo una administrasyon sentral para los judyos de Turkiya. Despues empeso a azer grandes reformas en las komunidades.
En el anyo 1841, tuvo una grande influensya en Yerushalayim para la konfirmasyon del Primer Grande Rabino. Mas despues, tomo la direksyon de una komisyon para enforteser la ekonomiya de la komunidad judiya en kompetisyon kontra los ermenis i los gregos.
Abraham de Kamondo tambyen djugo un rolo emportante en la transformasyon del sistema de edukasyon judiya en Turkiya.
En el empesijo del dizimueven siglo, fondo una eskola moderna, ‘La Eskola’ en el baryo Peri Pasha en Estambol, para las kreaturas de las famiyas menesterozas.
En el anyo 1856, Kamondo arekojo un grupo de aklarados rikos reprezantantes de la komunidad judiya, i ayudo a la fondasyon de las eskolas ‘Alliance Israelite Universelle’, ke fueron el empesijo de la edukasyon moderna evropea. Ma, esto fue el empesijo de las diskusyones entre el sentro konservativo i el sentro sekular.
A la fin de estas diskusyones, Kamondo risko de ser ekskomunikado. El Sadrazam arekojo el Konsilyo Rabiniko, i ansi, el se salvo de ser ekskomunikado. Ma, Kamondo no kijo mas kedarse en Estambol, i en el anyo 1870, se fue a Paris, i bivyo aya asta la edad de ochenta i ocho anyos.
Despues de sa muerte, komo el keriya, fue transportado a Estambol i fue enterrado en el simeteryo de Hasköy, al lado de los otros myembros de la famiya Kamondo.
La karyera del Konte de Kamondo en Estambol fue ekstraordinarya i turo trenta i dos anyos. Kamondo tuvo grande influensya sovre los Sultanes, Vezires, i Ministros del Imperyo Otomano. Lavoro muncho para ke los judyos tengan postos en el Governo Otomano. El fue el banker del Governo Otomano finke la Banka Otomana fue fondada.
Despues de sa muerte, el Governo Otomano izo una grande seremoniya para onorar este grande personaje.
La famiya Kamondo konstruizo munchos edifisyos en Estambol. Unos kuantos de estos son: Kuzey Deniz Saha Komutanlığı en Kasımpasha, Galata Résidence, Kamondo Han en la kaleja Serdar-ı Ekrem, Büyükada Han en la Avenida Meshrutiyet, Saatçi Han en Karaköy, Latif Han, Lacivert Han, Yakut Han, Kuyumcular Han, Lüleci Han, Gül Han i Las Eskaleras de Kamondo.
