Anet Pase
Esto muy orgulyoza de sintir sovre Karen Gerşon Şarhon, muestra editora de la pajina Judeo Espanyol i del Amaneser ke tomo lugar en la fondasyon Museo de Mujeres d’Estambol. Esto es un evenemento muy importante porke esta fondasyon inkluye un arshivo bien ancho. Es un muze dijital, en el internet. Se fondyo en 2012. Inkluye enformasyones de mujeres kaji de 2675 anyos. Empesa de Byzantion, Konstantinopolis fina oy. Son mujeres ke partisiparon a la kultura i el arte de Estambol durante estos anyos. Karen Gerşon Şarhon tomo lugar kon los lavoros sovre la musika sefaradi. Si keresh mirar, en kuatro linguas esta transmityendo. http://www.istanbulkadinmuzesi.org/
Antes tres semanas eskrivi sovre esta pandemiya no esta de eskapar. Kale azer tino a la entrada i la salida kon el puevlo. Akel momento los shifros estavan kaji 5.000, agora esta 25.000. Aunke munchas personas ya se vaksinaron la tresera vaksina. Bendicho al Dyo ke en los ospitales no ay munchos hazinos seriozos. Ama los shifros en el mundo entero esta pujando kon muncha prestor.
En los diyas pasados se avlo muncho de la mar i sovre el musilaj, yo esto dizyendo ke la mar
tyene mokos. Agora esta mas mijor, mas limpya. Parese ke le esta pasando la hazinura, ya esta mas klaro. I a mozos tambien, mos esta vinyendo bueno. Mos estamos echando a los brasos de la mar para arefreskarmos un pokitiko kon las kalores desgrasyadas.
Sin eskapar el musilaj, el pais entero esta sufriyendo kon los fuegos. En el mundo entero esta trokando el klima. Afilu unos kuantos grados kada anyo mas kayente, i esto esta deranjando al umano, a la tyerra, a la naturaleza de los bivos, a la biyolojiya, a todo modo de koza. La kayentor esta trayendo sekura i la sekura esta trayendo a los fuegos. El korason del pais, las sharas se estan kemando. Todos estan muy tristes, todos estan eskrivyendo kozikas en el Facebook i partajando lo ke se deve de azer. A esto se dize “a la otra vinida”. Lo ke se ve es: kale tomar parte kon las armas sosyales i kale lavorar kon la publikasyon entera. Gechmish Olsun.
El kolaborador del Şalom, İrvin Mandel kon sus karikaturas tomo lugar en el livro dalkavo de Ayşe Kulin. La famoza eskrivana kon el famozo karikatüristo del Şalom kooperaron en el livro Hazan. Este livro se esta vendyendo en las librerias mas konosidas.
Esta semana entrimos al mez de Elul. Va ampesar los Selihotes. El Dyo ke de meyoyo al mundo entero i ke se eskapen las dezgrasyas todas. Porke estas desgrasyas si kontinuan mas, mos van a trayer bastantes desgrasyas. Lo ke dezeo es un mez klaro, sano i rezyo, kon pas a todo el mundo, alegriya i sin mal.
