Anyos antes kuando se eskapavan las eskolas, pishin mos ivamos a las kampanyas. Los ijikos i las ijikas estavan orozos de estar liberos. Anyo entero estavan estudiando sus lesones i ya estavan kansados. I mozotros, los paryentes, estavamos orozos de estar kon muestras kriyaturas endjuntos. Esto ke vos konto era asta ke tuvieron 15-16 anyos. Despues de esta edad, ya se ampesavan a enfasyarsen. La vida kalma de las kampanyas mas no les estava enteresando. Se ivan kon los amigos a la sivdad i mozotros estavamos kon la alma en la palma asta ke tornavan. Anyos pasaron, eskaparon las eskolas i kada uno eskojo su kamino en los estudios. Ken se kedo aki, ken se fue a otros payizes. Ken kijo estudiar en la universita i ken kijo echarse al komersyo.
En enverano viene un tiempo ke no se topa mansevos por en medyo i en el mez de Junio ampesan a vinir los ke estan afuera unos a unos i ampesan a toparsen en las kampanyas. Viene una alegriya a las kazas, kalejas i a los kafes. Se oye rizas freskas ke mos manseveya. A la fin del mez de Agosto, ya se ampesan a despareser unos a unos porke los ke meldan afuera ya tornan a sus estudios.
Yo los asemejo a pasharos imigrantes. Vienen en enverano a sus nidos, i se van en invyerno a sus estudios para formar sus futuros.
En la sivdad no se ven estos pasharos imigrantes porke no ay muncha distansya de vista. Ma en las kampanyas, en el empesijo de la sezon, ya vemos ke en el tejado muestro o en en tejado de la vizina ay un nido de siguenya. Ke alegriya es de verlos ke vinieron kon sus famiyas. I en el empesijo de Agosto ya vemos los konvoyes de estos pasharos ke ampesan a arekojersen para bolar a los payizes kayentes. De verdad ya mos aze triste.
Ansina siento yo en lo ke vienen los mansevos a sus nidos i kuando tornan atras a sus estudios.
I kuando se avren las eskolas, entran i los mas chikos a sus klasas, no keda dinguna kriyatura en las kayes. Las kayes i las guertas son ermozas kon las kriyaturas. En este modo de tiempos me akodro de la konsejika famoza “El flutisto de Hamelin” ke aki la konosemos por “El flutisto del kazal kon ratones”.
Ke tenemos de dizir? Kon bueno ke vaygan i ke tornen. Reushita buena ke tengan en la vida porke el pan esta en la boka del leon.
