Ke desho ke tomo, ya vino enverano, ya esta para eskapar. Kon la vida normal, i todos mozotros mos desmodrimos. Por empesar, no estamos dando muncho emportansa a las maskas. Mos estamos enganyando de mozos para mozos, komo ya estamos en el eksteryor, no ay muncho menester de maskas. Myentres ke no es del todo djusto; dainda no eskapo i malorozamente los hazinos estan pujando den diya en diya. Munchos dainda no se vaksinaron i estan kontra la vaksina, de sorte ke el peligro esta kontinuando. A bueno ke salga porke otruna vez si mos enserran, va ser muy negro seya para la ekonomiya, seya para el moral de la djente i kreyo ke va pujar las depresyones.
El musilaj mos dyo un espanto de entrar a la mar, yo kaji un mez la miri denfrente la mar. Despues disheron ke no ay dingun mal, la verda ke esta limpya por limpya i yo komo todos me echi de kavesa a la mar, dishe lo ke disho el Dyo.
Kada anyo ay una kestyon de lugares de vakansas, komo Bodrum, komo Çeşme. Munchos estan preferando de pasar la enveranada en estos lugares ama este anyo no se uvo una epidemiya en Bodrum. Desde ke se oyo este musilaj, todos desidaron de ir a Bodrum. No kedo ken no se fue. Kada vyernes me vyene una persona para azer el menaje de kaza. La otra semana vyernes demanyana miri esta tadrando, dishe no seya ke peryo el vapor, en verda no es su manya, ya me da haber, le avri telefon me respondyo kon una boz durmyendo, le demandi ande kedates, el vapor lo fuites, no!!! Me disho, ya no te dishe ke me va ir en vakansa; esto en Bodrum. Ya me aviya olvidado, es vedra ke me disho ke no iva vinir ama a mi me paresyo ke se esta indo al kazal. Digamos a ken rankontri en el charshi de la Büyükada u estava u se va ir a Bodrum. Una amiga me demando dainda no te fuites a Bodrum, atyo “gitmeyeni dövüyorlar”(es una ekspresyon en turko ke kere dizir “al ke no se va, lo estan aharvando”, alora dishe ayde Forti antes ke komas haftona tomate el bilyetiko i vate a Bodrum ke ya kanso de yamarme mi ijo. Si Gülbahar ya se fue, tu ke manko. I de vista me desidi de ir. Para mi syempre es karga de deplasarme de la ada, ande esto tanto repozada, kon mis amigas kon mi plajizika, la ora ke kero me alevanto la ora ke kero me vo, ma no ay remedyo, a la fin no komere haftona!
Desha la shaka, agora esto eskrivyendo de Bodrum, esto en la kaza de mi ijiko kon mi inyeto i esto muy oroza. Esta byen kayente el tyempo ma yo kon el guste de estar kon eyos no esto sintyendo ni kalor ni kanserya. Sintir de un inyeto, “inshallah ke fuygas el avion i ke no te puedas ir a Estanbol, esta manera te kedas en Bodrum kon mi” estas palavrikas ya me abasto.
