Una de las sivdades mas antiguas de la tyerra de Israel, (o kon el nombre de akel tyempo, el Yishuv) Hebron se mansyona en la Biblia komo el lugar de la Grota la de las Patriarkos (Me'arat Ha'machpelah), ke Avram Avinu merko komo lugar de enterramyento de su mujer Sara. I ademas, en el tyempo de la konkista de la Tyerra Prometida, se sinyala spesifikamente Hebron: (Yoshua 14:13-15)
Yoshua entonses lo bendizio, i dyo a Caleb, ijo de Jephune, la sivdad de Hebron komo erensiya.
Por tanto Hebron fue de Caleb, ijo de Jephune, el Kenezito, en erensiya asta oy; porke se komporto derecho enfrente de Adonay, Dyo de Israel.
Hebron fue antes yamada Kiryat Arba, yamada sovre Arba, Arba ke era un ombre grande entre los Anakim. I ansi la tyerra tuvo repozo de las gerras.
Achakes de Me'arat Ha'machpelah, Hebron syempre fue konsiderada komo una sivdad santa i, durante la mayor parte de su egzistensya, Hebron fue una sivdad ande bivyeron endjuntos Arabos i Djudios del Medyo Oriente (sefaradis, Iranyanos, Irakyanos etc.), ke partajaron una kultura i lingua komuna kon sus vizinos.
Despues de la Primera Gerra Mundial, los britanikos tomaron el kontrol del territoryo de Palestina. Los arabos fueron aturvados i resintyeron de la afluensya de los djudios europeos i rusos ke vinyeron komo imigrantes. En Hebron, la kreasyon de la Yeshiva de Hebron, una seksyon de la Yeshiva Slabodka en Rusya, izo pujar sinyifikamente estas tansyones i nervozidades.
En el enverano de 1929, las tansyones fundamantales en la tyerra de Palestina se inflamaron kon las ardyentes palavras de los diskorsos de Haj Amin al-Husseini, el mufti de Yerushalayim (akel tyempo el era la otoridad prensipal de los muzulmanos en la Palestina). Al-Husseini era un nasyonalisto pasyonado i anti-djudio feros. (Mas tadre, durante la segunda Gerra Mundial, Al-Husseini se izo un aliado de Adolf Hitler i fondyo rejimentos Nazi de muzulmanos, de otra parte el fue tambyen uno de los provokatores en Irak ke rezulto en el masakro de djudios ke se konose komo Al Farhud). El 22 de Agosto, kuando 3 Djudios i 3 arabos fueron asasinados en un pleto en Yerushalayim, Al-Husseini empeso a difuzar rumores de ke los Djudios se estavan aparejando a un masakro jeneral de los Arabos en toda la Palestina. Malorozamante, lo ke afito en los dias sigyentes era totalmente el kontraryo.
El masakro de Hebron empeso el Viernes, en las oras de la noche (23 de Agosto) i kontinuó toda la fin de semana. Kuando aparesyeron los agresores, syegados por la sangre djudia, kon kuchiyos i palos, munchos djudios se refujyaron en la chika stasyon de polisiya de la sivdad. Otros se eskondyeron ande toparon la posibilidad i syertos fueron eskondidos por los vizinos arabos. La polisiya britanika prokuro una chika proteksyon al resto de los djudios i, verso la fin de la semana asta las primeras oras de Lunes, 67 djudios fueron asasinados atrosamente i munchos otros fueron feridos. Posterioramente, toda la komunidad djudia fue ovligada a abandonar la sivdad.
