Malorozamente ay unos kuantos dias ke “Bodrum, Marmaris, Fethiye” i munchas otras sivdades se estan kemando a kavza de los fuegos forestales, las sharas se estan kemando i no se esta puedyendo kontrolar.
La situasyon esta muy desesperante i los fuegos estan kontinuando. No ay el ekipo nesesaryo, komo por egzempyo, aviones ke pueden amatar este fuego del syelo a la tyerra kon agua…
El ministro forestal disho ke tomaron el kontrol en el fuego de Marmaris kon 3 aviones, 9 helikopteres, 146 tankes de agua, 20 sisternas de agua i 530 personas.
El Dyo ke apiyade a los ke peryeron sus kazas, sus moradas…
En kualo se topariyan!... Una grande desgrasya. Chikos, grandes, mujeres, ombres, las bestyas…
El fuego es un desastro natural ke no se puede tomar las prekosyones de antes. Ma tomar debasho el kontrol las sharas, es el dover del governo.
El puevlo tan inyorente, ke estan fumando sigaros ande ay arvoles, vedruras, estan kemando ogares para azer karnes asadas, i a la fin no estan amatando la lumbre komo kale, i los frutos del pino se estan kemando.
Ke pekado!...
Kuando todas las sostansyas de la naturaleza alkansan la temperatura de kombustyon, puede produzirse un fuego.
La ensufizensya de los tubos para amatar el fuego, la mankura de la edukasyon i el deskonosimyento del doredor tambyen pueden sitarsen entre las prensipales razones.
Los fuegos de las sharas se rankontran entre los desastres naturales, los mas peligrosos, i ke los arvoles son la fuente del oksijen del mundo.
El rezultado de los fuegos son muy peligrosos para todos.
Estamos en el dodjen dia de los fuegos. Dainda estan kontinuando en diferentes rejyones del pais.
Veramente muestros korasones se estan kemando de pensar esta trajedia.
Munchos paises estan embiyando apoyo kon una brigada de bomberos i aviones para amatar los fuegos.
En esto todo 60.000 hektares de sharas se kemaron, 33.000 bestyas se muryeron. Ay una piedrita de un milyar de liras a lo menos.
A parte de las sharas, en 60 maales, las kazas ke se kemaron,
Los ahires, los depos, las bestyas, los moradores ke peryeron todas sus fortunas i sus mantenimyentos…
Veramente una situasyon muy difisil i muy triste!...
Mizmo ke los volontaryos, los sivdadinos estan transportando kon kuvos agua de la mar, en diferentes zonas del pais esta kontinuando los fuegos.
Kuando las sharas se estan kemando, ande se estan indo estos umos?
Estos umos estan mallogrando el atmosfer porke, estan propajando karbondioksit, karbon preto i todo lo ke es mal al puerpo de la persona.
A kavza de la densita del umo, los rayos del sol no estan puedyendo ayegar a la tyerra.
Esta densita esta kavzando aksidentes, porke esta diminuando la distensya de vizyon de los aviyones i helikopteres ke se estan forsando para pueder amatar los fuegos.
Keridos Lektores, el Dyo ke mos guadre de los desastros naturales, de las kozas ke no mos puedemos guadrar. Sanos i rezyos, Rosh Hodesh Tov u Mevorah, un mez de Eylul yeno de sanedad i de fyestas.
