En los anyos 60 i 70 no sinti ni una vez en kaza una kantika de muzika sefaradi. Mis paryentes eran frankofones i mi padre konosia el italiano porke estudio en la Eskola Italiana. Los dos konosian el Espanyol. Mi padre konosiya el judeo-espanyol i mi madre un poko de judeo-espanyol i un poko de Espanyol halis porke vos avia kontado ke bivio dos anyos en un monasterio Espanyol serka de Paris para eskonderse de los Nazis. I es aya ke empeso a avlar kon su judeo-espanyol ke no entendiya en kaza i eskapo kon el Espanyol halis. Me akodro ke munchas noches karishtreavan la radyo kon ampules para sintir siertos festivales. San Remo era el mas famozo. En esta epoka Eurovizyon no egzistia dainda.
Me akodro ke mi primo grande, Moni despues se izo Metin, una tadre kuando estava indo a l’Amikal mos tomo kon mi ermana i pudimos segir un konserto sovre la muzika Sefardi. Me akodro ke era un grupo de tres personas. El famozo Yeşua Aroyo, ke tanyava la gitara i kantava, İzak Behar, ke tanyava la mandolina, i la tresera era Luiz Zara. No me olvido de este resital porke era la primera vez ke oyi kantikas asemedjantes.
En los 70 fui un miembro del koro de Yeşua Aroyo. Es despues ke vimos el lavoro de siertas personas muzikologes o amatores i amantes de esta lingua i muzika. En muestro payis puedemos mensyonar İzzet Bana, Karen Gerşon, Yeşua Aroyo, Jak Esim, i los miembros de estos grupos. Un syerto tyempo los Yanarocak kompozaron muevas kantikas Kreo ke la mas grande partida de los biervos de estas kantikas fueron eskritos por Yusuf Altıntaş. Era el grupo Erensia Sefaradi.
Dia de Alhad, kuando me alevanti es el muevo uzo; miramos los whatsappes ke mos embiyaron. I esta demanyana empesi kon las kantikas sefaradis. Me embiyaron en youtube las kantikas kantadas por Arik Davidov. Kantes kantadas kon una trampeta. Si keresh sintir estas kantikas https://youtu.be/LMT959Q-vNI. Despues ke sinti las kantikas, demandi a dos grupos si konosen a este sinyor. Me disheron ke bive en Batyam. Empesi a pensar si puediamos organizar en Edirne un konserto kon Arik Davidov. Mi amigo Rubi me disho ke no es bastante por esta shena. Kuando vash a ver el youtube vash a ver ke no es solo la trompeta ke kanta.
Es despues ke me embiyaron el youtube de un violonisto de 10 anyos ke es un maestro de Vivaldi. (The Menuhin competition).
Muestro amigo Metin Delevi mos embiyo el “Imno del Ladino” https://youtu.be/7Y4C7QvOSJk. Esto vyendo en el filmo, la profesora Tamar Alexander.
Un poko despues es Jak Treves ke mos embiyo “El mundo del Ladino Djudeo-Espanyol por Pablo Carrion https://www.facebook.com/1048274311899644posts/4085906814803030/
Es muestro amigo Rubi ke eskapo esta luvya de kantikas kon “Ballad for Eli” interpretada por Avi Avital ke es kreo el Number One de Mandolina. El mizmo fue kandidato a los premyos Grammy kon su mandolina. Pude segir su konserto en Estanbol. Era muy yuch de topar un bilyeto. Es Elda Sasun ke izo lo ke devia, i mos fuimos los tres kon mi mujer al konserto. I tuve la okazion de konoser este mansevo talentuoso https://open.spotify.com/track/3JB7t4PfTbX7wiW7ywayj?si=a2I8nCdIQ aoFx3hIou8dQ&dI branch=1
Puedemos mizmo organizar un konserto kon Avi Avital. Es una maraviya…
Este diya de alhad estamos terminando el diya kon el Enkontro de Alhad ke tyene oy mizmo un anyo. La Balabaya era Rachel Amado Bortnick i la Musafira era Gloria Levy. Una eskrivana konosida de los Estados Unidos. Tyene otros nombres. Ma para mi lo mas emportante es el primer disko sovre la Muzika Sefardi ke fue realizado en los Estados Unidos por esta sinyora: Gloria Levy Kirchheimer.
I lo ke kontan es ke todos los ke publikaron sus primeros albumes sovre esta muzika emplearon este album ke se puede merkar mizmo oy en diya. La estan enrejistrando elektronikamente.
Kero rengrasiar esta sinyora por los esforsos ke izo 63 anyos antes. Devemos rengrasyar i su marido ke le dyo apoyo.
