"Los judios, los kristianos, los musulmanes gerreyaron por miles de anyos, para konvenser su enimigo para ke troke su relijion. Nunka, las personas no pudieron bivir endjuntos en sostenyendo la unidad, la pas i la entegrasion. Kon estas gerras, kon tiempo, la djente se aminguo porke no kijeron akseptar la multikultura. Ma el eskarinyo de un mundo, ande las personas de las tres relijiones, (biviendo endjuntos, avlando diferentes linguas i teniendo diferentes kulturas), nunka aminguo".
La pyesa muzikal ‘Ashura’, ke vide unos kuantos anyos antes, esta empesando kon estos biervos.
‘Ashura’ esta kontando la istoria de los otros, los ke fueron ovligados a deshar sus patrias en la istoria entera, por modo de razones politikas o relijiozas.
Ashura es un alimento ke se puede rankontrar en munchas kulturas. En esta pyesa, ashura se esta empleyando komo un sembol de la sosiedad multikultural, siendo ke los diferentes ingredientes empleyados en azyendo ashura, no piedren sus savores, mezmo en buyendo en la mezma kaldera.
El tema prinsipal de la pyesa es la emigrasion forsada de las minoridades en muestro payis (empesando del anyo 1928), para krear una lingua i una kultura omojena en el payis.
Los mueve artistos mos estan kantando lamentasiones en diferentes linguas; en ebreo, en ermenesko, en grego, en judeo-espanyol, en kurdo, en la lingua de los lazes ets. Estas linguas estan sembolizando las minoridades forsadas a deshar sus patria. Los artistos estan empleyando la muzika, la luz i el movimiento para darmos el sentimiento de tristeza de estas minoridades arondjadas de sus pais.
Esta pyesa se djugo en ocho paizes en el etranjero (komo Suisa, los Paizes Bashos, Danimarka i Italia). Los espektatores etranjeros tomaron grande plazer de esta pyesa porke la idea detras del show es universal. En kada pais egziste el otro.
Komo estamos viendo en la pyesa, la tendensia de la ‘tolerensia’ empeso a entrar en aktividades artistikas en muestro payis. A la fin de la pyesa, los artistos mos ofreseron ‘Ashura’, komo un sueto. Este sueto siendo, un diya de pueder bivir en pas todos endjuntos i de pueder krear un mundo entegrado de multikulturas.
