Keridos lektores. La semana pasada todos los eskritores de la gazeta Şalom o de las otras gazetas eskrivyeron sovre los fuegos i sovre la pandemiya ke esta pujando en todas las sivdades. El Shabat ke pasimos, en la isla Heybeli, muy serka de la sivdad, tuvimos fuego. Todos ke estan morando en las islas se espantaron buen kadar de peryer las sharas de la isla. Ama esta vez, buena kapachidad del ministeryo i del puevlo de la isla, endjuntos penaron i aryento de una ora i medya se eskapo todo.
El ministeryo del salud, la semana pasada tomo una desizyon sovre las vaksinas. En primero tomaron una desisyon ke todos kale ke se agan la kuatrena vaksina. Ya se mareyaron todos lo ke van a azer. Despues de 24 oras, esta desisyon se anulo. Los doktores Yavuz Dizdar i Oytun Erbaş en un roportaje dize ke kale sintir i meldar todo bueno i todo modo de desizyon es personal porke kada uno kale ke mire en primero a la salud personal, kualo dize. Eyos dizen esta maldicha hazinura esta eskojendo genes. Vos konsejo de sintir este roportaje en el internet en instagram. https://www.instagram.com/tv/CSps4Y1laoS/?utm_medium=share_sheet
Kada alhad tenemos “Enkontros de Alhad” a las 19:00 oras de Estambol. Estos enkontros se partaja enriva del zoom o YouTube. I se puede topar las semanas pasadas en la pajina
http://e-sefarad.com./TV . Esta semana la balabaya era Karen Gerşon Şarhon i la musafira era la famoza artista del teatro, Rozet Hubeş. Eya kon sus riushidades en la vida teatral, dayinda es una piyonera para los mansevos de oy. Eya kon sus aktividades avrio puertas a las jenerasyones futuras. Eya djugo en munchas ovras de teatro famozas i travo un filmo i todos estos lavoros le trusho munchos premyos valorozos. Estamos todos muy orgulyozos de sintir de sus reushitades. Vos konsejo de entrar kada Alhad a e-Sefarad para sintir a los avlantes ladino del mundo entero.
Esta semana tenemos un livro muevo ke se publiko por Selin Feldman. Eya, atras dyes anyos lavoro en el periodiko Şalom. Era direktora de las publikasyones. Oy en diya eskrivyo su livro sovre Michel Foucault. Los ke se interesan por la filozofia saven ke no es kolay entender i eskrivir sovre el famozo pensador de este siglo. Foucault es un pensador kontraryo para los pensadores pasados. La felisitamos a Selin Feldman por esto lavoro difisil i asperamos mas muncho lavoros de eya. El livro se publiko del “Karakarga” i se puede merkar del Gözlem Gazetecilik, [email protected]
