I sera ke kuando vineresh a la tyerra prometida ke el Kriyador te da por eredar, i la eredaresh, i moraresh en eya. Tomaras de todas las primeras frutas de la tyerra, i las pondras en un sesto, i andaras al lugar ke el Kriyador eskojera, ayi su nombre, i vendrash a el Koen ke fuere en akeyos diyas. I tomara el Koen los frutos i los pondra delantre de la ara del santuvaryo de el Kriyador.
Kualo era el eskopo de esta enkomendansa? En akeya epoka kada uno i uno aziya su orasyon sigun se konsintiya en si i denusyava a el Kriyador todos sus dezeyos de su korason. En dando los primeros frutos a el Koen en el santuvaryo delantre de el Kriyador en orasyonando i akseptando ke todo lo bueno ke el poseda es una dadiva de el Kriyador, bendicho El. El savyo Arambam en el livro More Nevuhim trae una razon por esta enkomendansa dizyendo: Aregolar los primeros frutos, es enforteser la persona en si mizmo la natura de jenerozidad i apokar sus dezeos de su alma. Tambien esta mitsva, enkomendansa enbeza a el ombre de ser umilde. Akeya persona ke es patron de kanpos i vinyas, el mismo esta tomando el sesto de frutas en su ombro i se lo esta yevando a el santuvaryo a darselo a el Koen. Dunke este djesto aziya akodrar ke nozotros fuimos esklavos en ejipto a Paro i agora el Kriyador nos dyo muncho bueno i rikeza. Komo lo meldamos en la perasha “Ekev”, no seya ke komeras i te artaras, i fraguaras kozas buenas, i moraras en eyos i tus avejas se muchiguaran i plata i oro posedaras. En este estado se enaltesera tu korason i te olvidaras del Kriyador. Az muncha atansiyon en el tyempo ke estas en la abondansa, de akodrarte ke el Kriyador, tu Dyo, es ke te da fuersa por azerte reushir en tus lavoros. Oy ke no tenemos la enkomendansa de Bikurim, los primeros frutos, no devemos de olvidar la mitsva de tsedaka. La tsedaka balda las setensyas fuertes. La tsedaka eskapa a la persona de la muerte. Komo lo disho Yirmiyau, el profeta, de boka del Kriyador, aze tsedaka kada uno sigun sus posibilidad. Komo yo ago kon vozotros, ansi baldare todas las setensyas.
