Oy dia de alhad es el dia ke prefero para eskrivir mi artikolo en Judeo-Espanyol al Şalom. Esta semana tornando de la Ada en primero mos fuimos a vijitar mi madre, fue una okazion porke el doktor ke viene a vijitarla devia de vinir este alhad. A sus 92 anyos, kon syertos problemes, se topa en buena salud.
Estos anyos dalkavo en Turkiya entre las mujeres el Voleybol es el spor preferado i el ekipo nasyonal de muestro payis tyene grandes reushitades en los enkontros. En las Olimpiades de Tokyo, fueron uno de los 8 ekipos dalkavo. Ay una semana ke empeso las finales Evropeas i este mizmo dia aviya el mach entre la Turkiya i la Sueda. Reusheron a ganar 3-0. Ma malorozamente pude segir solo la partida dalkavo del mach.
Komo kada alhad a las 7 de la tadre, empesa el Enkontro de Alhad. I esta semana la Balabaya era Karen Şarhon. La Musafira Rozet Hubeş, ke es una artista de teatro bien konosida en muestro payis. No kreo ke emplea el Judeo-Espanyol ni en kaza, ni kon sus amigas. Malgrado los anyos ke no empleo esta lingua, estava avlando bastante bueno muestra lingua. So siguro ke solo sintio esta lingua en su chikes i no fue una lingua de komunikasion. Las dos semanas dalkavo tuvimos dos musafiras emportantes ke no emplean esta lingua oy en dia ma sirvieron kon sus aktivitades muestra kultura en sus mansevez. Kreo ke personas asemejante deven de ser miembros del Grupo Ladino Komunita para akodrarsen i a lo manko para meldar esta lingua presioza mismo si no tyenen la posibilidad o el tyempo de meldar el Amaneser o el Şalom.
Ke no vos pareska ke eskapi este alhad kon estas aktividades. Avia el match de Fenerbahçe en la televizion. I mizmo ke estava tadre, empesi a mirar la televizion i me esperti 15 puntos antes ke el mach se eskape. Ke mazal ke los dos goles fueron echados en estos puntos. I ganaron 2-0 el mach; kreo ke era bastante yuch.
Serka de eskapar mi artikolo no se lo ke ize kon el komputer i lo ke eskrivi no egzistia mas. Tengo verguensa de dizirvos ke so enjenyor de elektronika ma no so muy kapache kon el kompyuter. Mizmo ke mi patrona Karen me dize ke nada se piedre en este enstrumento de vez en kuando alkanso a pedrer el artikolo eskrito.
En la demanyana de este dia enkontri mi amigo, mizmo si es 30 anyos mas aedado de mi; Viktor Albukrek, kon la kuatren edision de su livro ke fue publikado por la Fondasion de las Islas. Le dishe si tyene tyempo la semana ke viene el 28 de Agustos; organizaremos en la Ada en el Anadolu Klubu un dia para firmar su livro. I acheto. Despues fue un alay de mesajes para ke el Anadolu Kulübü i la Fondasion de las Islas acheten este evenimyento. La semana ke viene vos asperamos el diya ke Viktor Albukrek va firmar su livro antes de un konserto de musika klasika. Este modo puedesh vinir a las 5 de la tadre para merkar un livro i despues puedesh tomar lugar para segir el konserto.
Vos dishe ke no estava topando el artikolo eskrito en mi komputer i es por esto ke me alevanti a las 7 de la demanyana para ke no sea un problem para Karen.
