Nasido Shalom Naumovich Rabinovich, el popular umoristo es famozo por su karakter ‘El Lechero Tevye’, ke enspiro el muzikal ‘Fiddler on the Roof’, en el anyo 1964.
Es muy enteresante ke, mezmo la jenerasyon mueva esta selebrando su aniversario. Los mansevos tambien, estan meldando las ovras de Shalom Aleichem porke su umor es ‘por todos los tiempos’. Lo ke mentenio el puevlo judio vivo, despues de tantas difikultades, es la umor i la kreensia de los judios.
El famozo umoristo adopto el nombre Shalom Aleichem, ke es derivado de un saludo ke sinyifika, ‘la pas seyga kon vozotros’.
Empesando del anyo 1883, Shalom Aleichem produzio mas de sinkuenta ovras en yiddish, i en el anyo 1990, el umoristo se izo una figura santral en la literatura yiddish. El eskritor enkorajo tambien, otros eskritores a eskrivir en yiddish, i kito dos almanakes ‘La Biblioteka Popular en Yiddish’, ke amostro kamino a munchos mansevos eskritores de yiddish.
Aleichem eskrivio en ruso por un periodiko, ke era la publikasion lidera rusa judia de la epoka, i eskrivio tambien, en ebreo para Ha-Melitz, i para una antolojia editada por Ravnitzky.
En el anyo 1905, el umoristo abandono la Rusia, forsado por los pogromes. Malgrado ke era muy popular, el fue ovligado de viajar de sivdad en sivdad en la Evropa, para pueder mantener su famiya. En el Julio del anyo 1908, en yindose a dar una konferansia en Rusia, se ezmayo en el treno, i fue ovligado de kedar munchos mezes en un opital, kon la diagnosis de tuberkuloz. Mas tadre, Aleichem eskrivio sovre este insidente komo ‘la topadura kara kon kara kon la muerte’. Mas despues, eskrivio su otobiografia ‘Funem Yarid’.
En el anyo 1916, Aleichem muryo en New York, a los anyos 57, dayinda lavorando enriva de una ovra ‘Motl, el Ijo del Kantor’.
Su funeray fue uno de los mas grandes de la epoka, en la sivdad de New York. Sien mil personas asistieron a este funeray.
Aleichem, en su vida, siempre dezeyo de ser komemorado kada anyo, kon una de sus estorias, una de las mas alegres, i resitada en kualsiker lingua. El kijo ser nombrado kon rizas.
En el anyo 1997, un monumento dedikado a Shalom Aleichem fue fraguado en Kiev, i un otro en Mosku, en el anyo 2001.
La kaye prinsipal de Birobijan tomo su nombre, i tambien munchas kayes en la Union Sovietika, en New York, i en Israel.
En el anyo 2006, el Banko Nasional de Ukranya kito una moneda kon la kara de Shalom Aleichem enriva.
Aleichem era un importante defendor de yiddish, komo lingua nasional judia, i lavoro ke esta lingua tenga la mezma valor i el mezmo respekto komo las otras linguas evropeas modernas. Aleichem no se konsakro solo al ‘Yiddishism’, el era tambien un grande nasionalisto de Israel.
Shalom Aleichem fue nombrado komo ‘El Mark Twain Judio’, porke los dos eskritores tuvieron los mezmos estilos de eskritura, i eskrivieron por los adultos i por las kreaturas. Mark Twain es tambien nombrado komo ‘El Shalom Aleichem Amerikano'.
