İsak Eskinazi
Los lavoros de la arkeolojia en Israel metyeron a la luz de diya una sala bien elaborada ke fue konstruida debasho del Kotel haMaaravi. Esta sala fue deskuvyerta aze poko tiempo, i se kreye ke fue empleyada komo sala de resepsyon para los miembros del Konsilyo lokal de Yerushalayim i para los musafires ke vienen a vijitar el Bet haMikdash.
La Sinyora Shlomit Weksler Bdolach, arkeologa de la Otoridad de Antikuedades de Israel, dize ke la sala esta formada de dos koridores ke están unidos por una fuente resivyendo la agua kon buris de plomo enstalados ensima de las kolumnas. Mizmo ke no se ve ninguna trasa, eya kreye ke deviya de aver divanes o sofas tipo de stilo grego-romano ande se espandiyan para komer o avlar.
Una parte de la sala fue deskuvyerta en el siglo 19 por el arkeologo Charles Warren, una otra parte en el siglo 20 i toda la sala fue kompletada a traves de los lavoros en los dalkavos anyos de la Otoridad de antikuedades de Israel endjuntos kon la Fondasyon del Kotel haMaaravi, mos dize la sinyora Shlomit Weksler Bdolach.
Aze komo un anyo, fue topado un mozaiko amostrando dos de los dodje espiones yevandosen una gran rama de uvas. La rama de uvas estava tan grande ke devian de atarla a un palo grande para pueder yevarla asta Moshe Rabenu. Este mozaiko es uno de los dodje mozaikos topados en una Sinagoga en Hukok, un kazaliko en el norte de Israel, en el Galil. Esto esta eskrito en el livro de BaMidbar de la Tora, kuando Moshe Rabinu embiya 11 personas kon Yeoshua para konoser el payis prometido i saver kuantos puevlos biven en Kanaan, si la tierra era rika, i a kualo paresiyan las frutas de aya.
El haber dalkavo de arkeolojia es lo ke toparon aze poko tiempo en Yerushalayim, ande se yama la sivdad de David. Los arkeologos toparon ke en este lugar uvo un grande rash i kozas ke se rompieron en el rash, komo kyases ke salieron de las ekskavasyones resientes ke se están azyendo en la Sivdad de David. Al pareser ke el rash afito aze 2800 anyos i esto esta eskrito en los livros de Amos i Zakarya mensyonando este rash de la epoka del rey Uziya.
El Profesor de arkeolojia de la Universita de Tel Aviv dize ke esta topadura de rash en Yerushalayim parese muy probable porke el izmo, izo lavoros de arkeolojia en Megido aze unos 15 anyos, enkontrando las mizmas trasas de rash ke afito aze 2800 anyos.
LOS DOS Espiyones EN EL MOZAİKO
