Konosesh a Kereban? Kereban el Kaprichozo? Deke le dieron este nombre? Kereban es un personaje de la novela de Jules Verne, el famozo eskritor fransez. Este Kereban biviya en el Imperio Otomano en los anyos del reynado del Sultan Mahmut II i era un merkader de tabako ke morava en Estambol. Un diya de Ramazan, vinieron un merkader de tabako i su sirviente de la Olanda para azer un negosyo muy grande. Se toparon kon Kereban. Akeya noche Kereban los kijo yevar a su morada ke se topava en Üsküdar. Ma djusto ke ivan a pasar a Üsküdar se ambezo Kereban ke el sultan metyo taksas muevas para los ke keren pasar enfrente del Bosfor. Esto ke oyo Kereban se inyervo muncho i disho ke no va pagar estas paras. El ken disho no, no disho si. Ke izo? Tomo los musafires i izieron el torno entero de la Mar Preta en dolasheyando por los Balkanes. Krimea (Kırım) de aya a Kaukasia, i arivaron a Üsküdar.
Deke vos konti esta istoryika? Meldi en el jurnal un haber ke me la izo akodrar. Una marioneta ke la yamaron Amal, una kukla de 3.5 metros ke reprezenta una ijika refujiada de Siria de 9 anyos, tuvo de azer un viyaje djusto komo el viyaje de Keremal. Esta vez el motivo no es del todo un kapricho. Sino ke es ke los viyajes son defendidos entre las islas gregas i la Turkiya por modo de la pandemiya. En el proyekto, ke lo yamaron “The Walk” (La Marcha), Amal vizito Adana, Tarsus, Musalı, Mersin, Antalya, Pamukkale, Denizli, Selchuk, Urla, Izmir, i Cheshme. Amal i su entorno partisiparon en eventos kulturales i artistikos, organizados kon la kolaborasyon de asosyasyones i fundasyones emportantes.
El viaje de la chika Amal ke partio de la Turkiya para enkontrar a su madre, va terminar en Ingleterra, el 3 de Noviembre, despues de Gresya, Italia, Fransia, Suiza, Alemanya i Beljika. Va pasar 8mil kilometros pasando las frontieras de 8 paises durante 4 mezes i va ser aresivida kon munchos eventos kulturales i artistikos ke seran aviertos al publiko por artistas i organizasyones en todas las sivdades ke vijitara.
El viaje de Amal ke era planeado de antes, se interrumpio porke pensavan pasar de Cheshme a Chios (Sakız adası). Ma por razon de la pandemiya no pudyeron pasar direktamente i izieron un viyaje djusto komo el viaje de Keramal, el kaprichozo. El ekipo de artistas ke yevo la kukla, izo una rota de Cheshme, Dalaman, Estambol, Athena i Chios. Mientras ke de Cheshme se puede ver las luzes de la isla ke ivan a pasar direktamente i en kurto tiempo.
