Süzet Herman
Kuando teniya 16 anyos, biviya kon mis padres en Şişli. Los ke biviyan en el apartamento kaji todos eran judyos. En enverano moravamos en La Buyukada, ande lo mas de djente de la maalle eran judyos.
Yo diziya a mis paryentes; salir de kaza es komo salir de la duana. Aki es gumruk kapisi. Kuando saliya a la kaye, el uno el otro i el de mas ariva me demandavan:
Ande te estas indo? Kon ken te estas indo? Kuando vas a tornar?
U bien:
Deke te vistites tan shik, kon alguno te vas a topar?
Oy te penyates diferente. Deke?
Estas kestyones no terminavan, puntos i puntos.
I deviya de responderles. Si no, eyos uydureyavan una repuesta ke keren. I yo penava despues para inyegarlo.
Un diya alevanti las manos al sielo, i arogi al Dio, ke me aga bivir en una kaza ande no va ver vizindado.
No vos vash a kreer, el Dio me oyo!
Agora bivo en una site, ande no konosko a dingunos. Ya se izo 15 anyos ke bivo en esta site, no avlo kon dingunos. Vo lo djuro ke esto muy kontente.
Ma i esta site tiene sus dezavantajes. La seguriada de esta site es muy apretado. No deshan pasar moshka sin demandar.
Durante la pandemiya, ande era defendido de salir a la kaye, tomi la yave de kaza i sali a kaminar en las kalejas serka de la site.
Kuando torni, el guvenlik me demando la karta ke amostra ke moro en esta site i yo no la teniya allado. Entrar a la site me duro15 puntos.
Me demandaron kestyones de paro.
Esta semana ize badana en kaza. El badanadji para eskapar presto su echo vino a las 8 de la demanyana. No lo estan tomando aryento. Porke los lavorantes no pueden entrar antes de las 10.
Le dishe al lavorante de asperar leshos del guvenlik, mandi al shofor para ke lo tome. Le metimos a la kavesa un chapeyo i la maska fina los ojos, i lo izimos entrar kon araba. En mi kaza entrar a las eskodidas. Esto no se tyene oyido. Estash viyendo, todas las kozas buenas, tyene sus dezavantajes.
