Ephraim Kishon, un sovrebiviente del Olokosto era uno de los umoristos de los mas konosidos de Israel. Sus livros satirikos i sus filmos fueron populares en Israel i en Evropa. Kishon nasio en Budapest en 1924 i murio en la Suiza kuando tenia 80 anyos.
El primer ministro de Israel, Ariel Sharon, aviya dicho ke Kishon era "uno de los mas grandes kulturales de muestra jenerasion".
Kishon sovrebivio en un kampo de konsantrasion nazi en la Segunda Gerra Mondial antes de emigrar a Israel en 1949 kuando tenia ventitantos anyos.
"Izyeron un yerro en deshando bivo un satiriko", eskrivio mas tadre Kishon.
En Israel, el eskrivio ovras de teatro, filmos i novelas para periodikos. Establesio una kompanyiya de teatro i tambien dirijo filmos.
Su filmo mas konosido fue "Salah Shabati", ke es la istoria de un emigrante judio prove del norte de Afrika ke lucho kontra el prejudizmo i la burokrasia mientres penando a asimilarse al pais mansevo dominado por judios evropeos. El filmo fue nominado a una Akademia.
Otro filmo muy popular eskrito i dirijado por Kishon, "Policeman Azoulai", sovre un ofisial de polisia, fue nominado a un premio de la Akademia en 1972.
Kishon eskrivio dozenas de livros tradusidos a mas de 30 linguas i fue popular en Evropa, partikularmente en Alemanya.
Sus ovras las mas konosidas son, "Mira atras, Sinyora Lot" i "Lo sentimos, ganamos!", ke se publiko en 1968 ande Kishon egzamino la egzistensia de Israel en un medio oriente enemigo.
En vezes le demandavan al eskritor deke pensava ke era tan bien resivido en Alemanya.
"Mi padre dize ke es un grande sentimiento, ke los ijos de mis enimigos son mis admiradores", disho el ijo de Kishon, Rafi, en un program de la radio de Israel.
Kishon aviya dicho ke en Israel, el komo un emigrante no fue kompletamente akseptado por la elit kultural del pais. Finalmente se enstalo en la Suiza, ande bivio durante munchos anyos, kontinuando a pasar muncho tiempo en Israel.
Las ovras de Kishon estan bivyendo kon mozotros i van a bivir kon las jenerasiones futuras.
Kishon resivio el Premio Israel, ke es el onor el mas prestijiozo del pais, en 2002 por sus ovras. Eskrivieron en su premio "una luz salvada del fuego del Olokosto, ke suvio a las alturas de la satira en el mundo".
Varias biografias dizen ke su nombre de nasimiento era Ferenc Kishont o Ferenc Hoffmann. Kishon troko su nombre despues ke vino a Israel.
Kuando murió, trusheron su puerpo de la Suiza a Israel para enterrarlo en Tel Aviv.
