“Eskuchad los syelos, las palavras ke esto avlando, i oyid las dichas de mi boka”. Ansi enpesa la perasha de Aazinu, kon las palavras de Moshe Rabenu. Ansi Moshe Rabenu se aderesa a los syelos ke el estava serka de los syelos, por razon ke ya se aserko los ultimos diyas de su vida. Un poko mas, el ya se iva apartar de este mundo materyal, i se iva ir a el mundo vinedero. Por esta kavza enpeso, i se adereso a los syelos. I despues se adereso a la tyerra. El tomo por testigos a los syelos i a la tyerra. Si el puevlo Djudyo non va sintir las palavras de El Kriyador, no va andar en sus kaminos, los syelos i la tyerra van a dar testimonyo por sus no buena kondukta. I el eskopo ke Moshe Rabenu tomo por testigos para testimonyar la kondukta del puevlo Djudyo a los syelos i a la tyerra fue para ke sean firme todo tyempo ke el mundo egziste. En kavzo ke el puevlo Djudyo no va estar korekto kon El Kriyador i kon su ley la santa, estonses los syelos no van a dar las luvyas i las tyerras no van a dar produkto. Nuestros savyos dan tambien otra razon sovre este sujeto. Kijo dizir Moshe Rabenu, mirad a los syelos i ala tyerra si eyos salen del orden del patron de el mundo. Los syelos syempre dan las luvyas i la tyerra su produkto i no trokan des sus naturas.
El mundo se sostyene por el merito de la ley, i de el sirvisyo a El Kriyador, i sovre la bienfezensya. Si somos korektos en estos pilares sakros, egziste en el mundo pas i trankilidad. Bivimos sin espanto vida repozada. La luz de los syelos es la Tora. Por el merito de la Tora egziste en el mundo el repozo. David Ameleh en el livro de Teilim dize: El Kriyador, nuestro sinyor, ke fuerte es tu nombre sovre el mundo. Tu das la ermuzura a los syelos. Ansi da de tu ermozura a la djente. I da de tu luz a los enbezantes de tu ley santa. Por la boka de los chikitos i mamantes enforteses los simyentos de el mundo. David Ameleh kijo dizir de la Tora ke se enbezan los chikos i ke se syente de sus bokas, se sostyene el mundo. El Kriyador ke nos de fuersa i la enerjiya de azer teshuva kumplida. I este Shabat ke es Shabat Teshuva, El Kriyador ke nos membre a nozotros i nos de vidas largas kon salud buena.
Gemar Hatima Tova.
