Esto meldando un romanso ke se yama “La Ermoza de Yerushalayim” eskrito por Sarit Yishai Levi. Antes de ampesar mi artikolo vos kero azer konoserla. Sigun la biyografiya kurta ke esta en la kacha del livro, Sarit nasyo en el anyo 1947 en Yerushalayim. Su famiya era Sefaradi i biviyan desde syete jenerasyones en esta sivdad.
Eya estudio en la Universita de Tel Aviv. Despues ke djugo en unas kuantas piyesas de teatro i filmos de sinema abolto al jurnalismo en eskrivyendo biyografiyas i artikolos sovre viyajes. Izo tanbien programes de televizyon.
Su primer romanso, del kual vos va avlar, gano premios i en 2014 fue deklarado “Bestseller”. Izyeron tanbien un filmo de largo metraje.
No lo eskapi de meldar dainda ma vos va kontar en resumen los puntos prensipales de este romanso.
Se trata de la istorya de la famiya sefaradi ke tiene la alkunya “Ermoza”. Despues ke meldimos ken son los paryentes fina dos jenerasyones antes, Sarit mos traye a la jenerasyon de agora, la chika famiya kompozada del padre Gabriel, de la madre Roza i de sus tres ijikas ke son Luna, Rahelika i Bekita. El romanso ke el empesijo (para mi) no parese a nada, en kontinuando a meldar no se esta puedyendo deshar de la mano.
El romanso esta pasando en el tiempo de la fin del Imperio Otomano i de la okupasyon de la Palestina por los Inglezes.
Gabriel tiene una botika chika de sharkuteriya i la famiya se pasa bueno. La istorya es bazada sovre las relasyones entre los miembros de la famiya i sovre las ijikas ke se estan engrandesyendo, kada una kon su karakter diferente i sus primeros amores. La situasyon politika antes del estado de Israel, las bombas, los fuegos, las matansinas de los arabos. Todo esto, esta kontado komo una broderiya de dantelas.
En meldando el livro vos estash sintiendo komo un otro miembro de la famiya. Aparte de esto ay en el romanso suspenses ke travan la kuryozita.
No vos kero kontar demaziya para ke no piyedrash el entereso kuando vash a meldar este livro.
Vos rekomendo de meldar el livro ke a mi me esta plazyendo muncho.
Esta semana ke eskapimos Kipur, estamos aparejandomos para la fiesta de Sukot i ampesimos a dekorar la suka ke se topa en la guerta de mi ija. Vos auguro Sukot alegre kon todos djustos i sanos i rezyos.
