En el tyempo del Imperyo Otomano, su nono era kadi de Bagdat, su padre teniya un posto alto en el palasyo del Sultan, el era un mansevo ke teniya una vida muy rika, se engrandesyo kon mosas, mosos, en una grande rezidensya en el mijor sentro de Estanbol en Chamlidja (ÇAMLICA). Komo meldó en eskolas estranjeras i saviya linguas, fue envitado a Estonya para tomar una edukasyon superyor.
En una fyesta en Londra rankontro una muchacha Ingleza ke a punto se enamoro.
Sus sentimyentos no fueron de una parte, se aserko de eya i de vista empesaron a konversar. En avlando el se ambezo ke esta linda muchacha se iva kada demanyana a kaminar kon su kavayo a Hyde Park.
Una demanyana byen demprano el se fue a Hyde Park i eya ya estava aya kon su kavayo, por siguro ke ya lo estava asperando, no era koensidensya. De vista kaminaron endjuntos, komyeron en un restoran, konversaron i esto kontinuo un syerto tyempo. Estavan en un esfuenyo dulse, orozos i kontentes. Ma una demanyana se despertaron de este esfuenyo porke el mansevo ya aviya kompletado su edukasyon i deviya de tornar a su pais. Espartir no era posivle; sin pensar muncho, le demando a la ija ermoza:
--- Keres kazarte kon mi i vinir a bivir a Turkiya?
Eya salto de la alegriya. Unos kuantos minutos despues, se atristo i empeso a yorar. El mansevo le demando:
--- Ke afito!!! Un punto antes estavas loka de la alegriya, en un punto kualo troko? No me keres byen?
--- Te kero byen a murir! Estar kon ti la vida entera es lo mas muncho ke kero... ma es emposible... no lo puedo deshar a Jack!
--- Jack? Ken es Jack?
I la muchacha le empeso a kontar:
--- Mi famiya eran aktores de teatro, teniyan kumpanyas kon los kuales viajavan de un lugar al otro. Kuando mi padre muryo, mi madre fuyo a la Australia kon un ombre de la kompanya i a mi me desho kon mi nona maternal. Povereta mi nona me tomo al lado, me protejo, me engrandesyo i me topo un novyo ke sola salvasyon era de kazarme. Ma las dezgrasyas no eskaparon; mi marido era soldado, se fue a la gerra i mas no torno. Desho detras una mujer de 16 anyos prenyada de ocho mezes. Jack es mi ijo.
El mansevo oyo fin al kavo, la abraso i le disho:
--- No ay dingun problem, mos vamos a ir kon muestro ijo.
Kon Orient Express... arivaron a Estambol.
El mansevo ke le disho no ay dingun problem, aviya problemes grandes.
Era los anyos de okupasyon, la djente estavan sospechando a todos i estavan ansyozos del estado del pais. En este modo un estado trayer una mujer ingleza kon un ijo era un dezastro.
Kuando entraron a la kaza del mansevo, asperaron un vinido bueno i abrasos ma no fue lo ke pensaron. La famiya del mansevo se revolto i el padre empeso a gritar:
--- De ande vino esta novya ingleza! En estando el pais yeno de inglezes, komo nada es espiyona i este ijo dande salyo?
Kurto, el amor era muy muy grande, eya troko de relijyon, se konvertyo en muslumana, se tapo la kavesa, se troko el nombre i se izo NADIDE.
El pais se salvo; se establesyo la republika. Ma las leyes trokaron. Un turko ke lavora en una sosyeta del estado no puede tener mujer estranjera. El mansevo komo teniya un posto grande, le propozaron de divorsar i bivir endjuntos. El mansevo esta propozisyon la tomo komo un ensulto i les disho:
--- Mi mujer desho su pais, su famiya, su echo; vino kon mi, troko de relijyon. Yo no divorso.
De vista dyo su demisyon. Empeso a lavorar en echos diferentes para mantener su famiya i entremyentes les nasyo una ija. Ma malorozamente los echos no kaminaron bueno. Vendyeron platas, djoyas, kazas, moradas ke teniyan muncho bueno. Se fueron a morar en kazales diferentes i a la fin kayeron en un estado de no tener un bokado de pan para komer. Eya nunka se kesho; syempre peno para estar en pyes, syempre al lado de su marido, syempre kon pasensya i kon amor.
Un diya vinyeron dos personas de la ambasada Ingleza para ayudarles i tomar a sus ijos para mirarlos i edukarlos. Ma eya los arondjo de kaza i les disho:
--- Mi marido es Turko i yo tambyen so Turka; mis ijos se van a engrandeser al lado de sus padres i madres; no vengash mas!
El marido de las ansyas se dyo a bever, se izo alkolik i muryo, Nadide paso unos diyas muy difisil; se izo hazina i muryo de pnomoniya en la kaza de su ija ke teniya muncha konfiensa i su ijo ke la amava muncho. El ijo se yamava MÜŞFİK KENTER. La ija se yamava YILDIZ KENTER.
