Saver es bueno İsak Eskinazi
La letra ke Albert Einstein eskrivyo a su ermana Maja se vendyo en una suvasta en Yerushalayim por $39.350. Esta letra eskrita en 1922 i embiyada de un lugar pedrido del norte de la Almanya, mos aklara ke el sientista tuvo el presintimyento i el espanto de ver la yegada del nasyonalizmo i del antisemitizmo en su payis kaji unos diez anyos antes ke los Nazis suvan al Poder.
Albert Einstein eskrivyo esta letra kuando se eskondyo después ke los ekstremistos de la Derecha mataron a su amigo kerido,
, el Ministro de los Echos Eksteryores i en mismo tiempo un buen Djudyo, siendo direktor de la “AEG” tenyendo fabrikas en 84 payizes. Kuando la polisiya le yamo la atansyon ke despues del Ministro, i a el lo puediyan matar, tomo la desizyon de salir de Berlin i fuirse al norte de la Almanya en un lugar ande no lo toparan.
Walter Rathenau
Komo detrás del anvelop de la letra no teniya el adreso de regreso, se pensa ke Einstein estava en la sivdad de Kiel antes de suvir al vapor para dar konferensyas en otros lugares, dize la kaza de suvasta “KEDEM” de Yerushalayim, la kaza ke vendyo la letra.
En la letra Einstein eskrive a su ermana Maja: "Dingunos no saven ande esto i kreyo ke pensan ke esto pedrido. Esto azyendo muy bueno porke kon mis kolegas antisemitas, la ekonomiya i la politika no se ven muy klaras. Esto muy kontente ke me aleshi de todo esto a lo manko por sesh mezes."
El sudirektor del proyekto de las letras de Einstein en el Instituto de Teknolojiya de Kalifornia, Zeev Rozenkranz, dize ke Einstein ya yamo la atansyon sovre la suvida del Antisemitizmo en Almanya mizmo antes de esta letra. La reaksyon de Einstein Según Rozenkranz, era ke paniko en primero i ke pensó deshar la Almanya por entero. Ama en poko tiempo troko de idea i torno a Almanya después de dar konferensyas en syertos payizes de Asya komo Japonya, India, China, entre los mezes de Oktubre 1922 i Marso 1923, i después de saver ke gano el premio Nobel sovre su estudio de fizika: El Efekto de la Fotoelektrika.
Kuando Hitler en 1933 empeso a kitar leyes kontra los Djudyos, el ke estava vijitando los Estados Unidos, desidyo de kedarse aya i mas no torno a Almanya. Así tuvo munchas nasyonalidades: Almanya, Suisa, Prusya, Amerikana. Antes de la segunda gerra mundial, eskrivyo una letra al prezidente de los Estados Unidos, Franklin D. Roosvelt denonsyando los lavoros de los Almanes sovre un program de armas nukleares, rekomendando ke los amerikanos tanbien empesen a lavorar sovre un program paresido malgrado ke el, no defendiya las armas nukleares.
Una otra letra eskrita por Einstein i metida a la vendidad por Chirstie’s se estimo a un presyo entre 1 milyon i 1milyon i medio de dólares. La letra aze parte de la korespondensya ke tuvo kon el filozofo Erik Gutkind i avla sovre su identidad Djudiya. “Yo no veygo ninguna diferensya de dinyita entre otros puevlos i el puevlo Djudyo al kualo orozamente apartenesko i en la mentalidad del kual tengo raizes muy profundas. Según mis eksperiyensas, no veygo nada ke aga este puevlo el Puevlo Eskojido” eskrive Einstein.
En 1954, eskrivyo una otra letra dizyendo: “No so ateisto. Si tengo yo koza ke se puede yamar relijyon, es la admirasyon sin frontieras por la Natura de muestro mundo ke muestra siensya puede revelar”. En el anyo 2012, esta letra se vendyo por 3 milyon de dólares.
Diversas refleksyones de Einstein:
“La Siensya sin Relijyon es sakat. La Relijyon sin siensya es syega.”
“Ay dos kozas ke son sin fin: El Universo i la bovedad umana. Ama por el universo no esto totalmente seguro”.
“Es mas difísil de romper el punto de vista ke el atom.”
“El mundo se va destruir no por la parte de los malos si no por los ke miran sin reaksyonar.”
“No se komo será la tresera gerra mundial. Ama se ke no va aver muncha djente para ver la kuatrena”.
