Jared Polis es el primer governador ke se kazo kon una boda entre personas del mizmo sekso. El governador de Kolorado se kazo kon su kompanyero de 18 anyos, Marion Reis en una seremoniya judiya tradisyonala en Boulder.
Mierkoles, la Rabbi Tirzah Firestone dirijo una seremoniya de boda judiya tradisyonala para el governador de Kolorado, Jared Polis i su kompanyero Marion Reis, en Boulder.
Jared Polis fue el primer governador omoseksual en los Estados Unidos ke se kazo ofisyalmente. El governador de Kolorado i Marion Reis organizaron una entima boda judiya tradisyonala entornados de amigos serkanos i famiyas entimas. Tanbien sus dos ijos se topavan en esta seremoniya. La boda fue selebrada en el kampus de la Universita Boulder en Kolorado.
El governador de Kolorado es el primer funksyonaryo ke se kazo kuando estava en su posto, asigun el Fondo de Victoria LGBT. Antes ke Jared Polis fuera elijido governador, paso a los rejistros komo un padre en una relasyon entre dos personas del mizmo sekso.
Kualo es ser el primer gay governor de la Amerika?
“La mas grande leson ke mos ambezimos en estos mezes dalkavo es ke la vida ke konosemos puede trokar en supito. Estamos engradesyentes por la sanedad de muestras famiyas i muestros amigos i tanbien estamos orozos ke tuvimos la oportunidad de selebrar muestra union todos endjuntos”, disheron Polis i Reis. Tres anyos antes de este kazamiento, salyo la ley de la Korte Suprema de Estados Unidos, de pueder kazarsen entre personas del mizmo sekso.
“Kuando me estava engrandesyendo, estos kazamientos no eran posivle, no se avlava mizmo” disho Reis ke tiene 40 anyos. Tanbien aviya munchas enformasyones falsas. Por esto no avlimos de kazamyento asta agora.
Reis avlo a la revista “Colorado Sun” ke Polis izo la proposizyon de kazamyento a Reis, en lo ke estavan gerreyando en sus kazas de Boulder kontra el virüs Covit 19. Djusto antes ke Reis fue ospitalizado, Polis le propozo de kazarsen.
De otra parte la semana ke pasimos, Sarit Hadad, una de las mas famozas kantaderas de Israel deklaro ke eya bive kon Tamar Yahalomi, desde dos anyos. Tamar Yahalomi tanbien es una kantadera famoza de muestros diyas. Sarit disho ke eyas son un kuple ke tienen muncho amor i estan muy orozas endjuntos.
Esto ke eskrivi, puede vinir a las personas, muy normal o muy anormal. Ma estamos biviendo en un tiempo ke kada uno bive la vida ke le plaze.
