Rachel A. Bortnick
Oganyo uvo dos selebrasiones enteresantes de Sukot en Ankara, la sivdad kapitala de Turkiya. La una, djugeves el 23 septembre, tuvo lugar en la suka fraguada en la guerta de la Embasada de Almanya, en kolaborasion kon la Embasada Israeliana, a la okazion de markar los 1700 anyos de prezensia djudia en Almanya. Prezente en esta okazion estavan el Hahambashi (Granrabino) Isak Haleva, ambasadores de varios paizes, el ko-prezidente de la Komunidad djudia turka, İsak İbrahimzadeh, i unos kuantos miembros de la komunidad djudia. Los diskorsos echos en esta okazion dieron una mirada a la larga istoria de djudios en Almanya, kon todos sus epokas, buenas i negras, siempre adjustando mesajes de pas para el avenir. En esta selebrasion avia tambien una ekspozision sovre la vida de los djudios en Almanya.
Al dia, viernes demanyana, tuvieron lugar los servisios relijiozos de Sukot en la kehila (sinagoga) de Ankara, ande estuvieron tambien los ambasadores i miembros del ekipo de la embasada amerikana. Al segito de las orasiones, uvo una rika meza de seuda en la suka kon el balabay Can Karako, prezidente de la komunidad djudia de Ankara.
(Traduksion adaptada del artikolo por Renan Kohen, kon fotos, en: https://salom.com.tr/haber-119823-ankaraacuteda_sukot_kutlamasi.html)
