Ya savesh ke en Estanbol tenemos dos tevilas. La primera en la Sinagoga Bet Israel en Şişli, i la segunda en la Sinagoga Bet El de Caddebostan. La tresera se topava en la Sinagoga Neve Şalom. Komo ya savesh, oy en dia no ay mas Djudios ke moran en este kuartier. I avlimos kon los dirijentes del Neve Şalom i de la Komunidad para formar un Sentro de Bushkedades sovre la Kultura de los Djudios Turkanos. (Istoria i Relijion Djudia). Ya tenemos buen karar de livros istorikos de ley en el vyejo edifisio del Gran Rabinato. Agora estamos avlando kon la Biblioteka de Atatürk para alimpyar los livros de los guzanos ke tyenen (syertos); alimpiarlos i si tenemos la posibilidad, keremos meter la grande partida de estos livros en dijital / en el internet. Tenemos dos salas de setenta metros kares.
Keremos meter un komputer ande vamos a pueder topar todas las tezes ke se realizaron i ke se van a realizar en muestro payis. Los dos livros ke fueron publikados por las Edisiones Libra sovre la bibliografia de los livros sovre los Djudios del Imperio Otomano i de la Turkiya; sovre la Istoria de los Djudios; sovre la ley Djudia. Esto todo ande se topa, las tezes i de los artikolos publikados mos va ayudar en este lavoro.
Para konservar los dokumentos en las kompanyias komersiales oy en diya se emplean kashas ke se topan endjuntos. Almaryos de fierro en forma de kasha i 4 o 5 deyos endjuntos. Vamos a emplear una koza asemejante para konservar los livros presiozos i istorikos.
Va ser un echo muy yuch. Es djusto ke merkimos un program para el komputer ke es empleado en la Biblioteka Atatürk ke es una de las mas organizadas.
Ya savemos ke ay syertas personas ke tyenen munchos dokumentos en sus kazas o en sus buros. Ma mizmo kuando apanyaron sus 80 o 85 anyos no saven lo ke deven de azer kon estos dokumentos. No tyenen konfiensia para dar a una persona. I despues es un eskidji ke los va merkar i estos dokumentos se van a vender en siertas vendidas publikas. Kreo ke en unos kuantos anyos vamos a tener la posibilitad de trokar este komportamyento. La koza la mas emportante va ser los/las ke van a lavorar en este Sentro.
Kreo ke el lugar ande vamos a emplear va estar pronto en el mez de Novembre. Bivir i ver!
