En kaminando en el bodre de la mar en Tel Aviv, vemos una kaza kon una arkitektura muy diferente. Malgrado ke el UNESCO aze atensyon a mantener la blankura i la redondes de el estilo de Bauhaus de Tel Aviv, en vezes se topan arkitektos korajozos ke desidan ke dinguna regla se puede aplikar.
Vos kontare sovre esta kaza diferente. Esta kaza es yamada “La kaza loka” i se topa en Tel Aviv, Israel, en la kaleja Hayarkon numero 181.
Los ke pasan por delantre dizen: “Esta kaza fue kreada por Gaudi?” “No, no es”, “Si, si el es”. Ansina kontinua la diskusyon. No seya ke el grande arkitekto espanyol, Antonio Gaudi vino de tan largo kamino desde Katalonya a Tel Aviv para fraguar su kaza propria? No! No lo izo. I nunka kale dizir esto al arkitekto verdadero ke desino i konstruyo la “Kaza Loka”. Este arkitekto era Leon Gaignebet. Leon era un arkitekto fransez nasido en Siria. El no tuvo dinguna koneksiyon kon las kazas o edifisyos ke se topan en Barselona. Leon fraguo esta kaza para la famiya Bollag. La fragua turo del anyo 1985 asta el anyo 1989.
En su vizion del anyo 1985, teniya el objektivo de krear una kaza ke kontiene la mar i el dezierto endjuntos. Izo los planos todos djustos ma peno 7 anyos para tomar la permisyon para la konstruksyon. Porke el projeto estava kontra del estilo Bauhaus. Ya savesh ke Tel Aviv es el muzeo del estilo Bauhaus i es yamada la sivdad blanka.
Ansina izo en la kaza las partes blankas de los balkones ke reprezentan la mar i las olas (dalgalar), i las partes bejes representan las arenas de las playas. De la otra parte de la kaza vemos eskulpturas de arenas i munchas plantas. Aryentro del edifisyo se topan unas kolonas muy grandes ke kada una reprezenta una sivilizasyon diferente.
Esta kaza se izo una atraksyon para los turistos, por modo de su estilo spesyal. Es verdad ke la kaza vos va surprender muncho ma tanbien de mezmo va ser una koza ke no vos vash a pueder olvidar.
