Keridos Lektores,
Ya pasimos las fyestas Rosh-Ashana, Kipur, Sukot i Simha Tora. El Dyo ke mos ayege para kada anyo kon sanedad i kon todos endjuntos.
Los tyempos este anyo empesaron a yelarsen temprano. Los dias se estan akurtando i se esta azyendo presto areskuro. Esto mostra ke el otonyo ya vino i a poko a poko ya mos vamos a enserrar a muestras kazas. Malorozamente este virus “Corona” no tyene intisyon de pasar i esto mos esta amostrando ke i este invyerno vamos a estar imprizonados solos i sekos en muestros kantones mizmo ke munchos de mozotros ya se vaksinaron. Ma la insensibilidad de la majoridad mos esta enserrando a muestros kantones. Veramente, me esto anksyeando por los mansevos, por muestros ijos i los inyetos.
Ke pekado ke estan bivyendo en este dor kon tantos problemes!...
“Covid” se esta vyendo agora en munchas kriyaturas.
Lo ke mos esta konsolando es ke, lo estan pasando mas livyano en komparezon kon los grandes. Los mansevos estan en todo modo de lugar, uno enriva de otro, sin maskas, sin distansya, komo ke la “Corona” no egziste.
La ganansya de este enverano fue para mi, ke mi ijo kon la mujer i la inyetizika vinyeron de la Alemanya para pasar endjuntos el enverano en Burgaz.
“Burgaz” es la izla unika ke esta konservando la tekstura de izla por las oras. Burgaz es un adreso ke kale vijitar los edifisyos istorikos, las eglisyas, la sinagoga, la meshkita i los lugares famozos de entrar a la mar. El muzeo de “Sait Faik Abasıyanık” ke es una persona muy emportante de la literatura turka, un eskrivano istoriko… Kale vijitar este lugar byen entretenido para konoser la vida de este eskrivano ke era enamorado de esta izla chikitika.
El lugar el mas vijitado i famozo es la playa i el restorante de Kalpazankaya. Tyene una vista maraviyoza i se puede ir aya seyga kon bisikleta, seyga en kaminando 20-25 puntos.
Kalpazankaya es un lugar leshos del bruido de Estambol, tyene una natura muy spesyal i la mar muy limpya. La echadura del sol aki, es un panorama vista de ver. Las kolores del sol una maraviya…
Ay a lo menos una semana ke vino el otonyo komo kada anyo, esta sezon es ermoza sovre el punto de vista ke mos mostra unos peyzajes presyozos kon las kolores marones, las ojas de los arvoles amariyas i koroladas ke empesan a kayer…
Kon la venida del otonyo las oras trokan i se van una ora atras. El sol no kayenta muncho. Da mas poka luz.
El tyempo friyo, kon luvya i el ayre son los mesajeros del invyerno ke se esta aserkando.
El sol i la kalor dan la felisidad a las personas. Kuando es yelado, las personas se azen depresivos, deprimados i empesan a kesharsen del desvelo, de la kanserya, de las desfuersas i de las dolores.
Por pueder kontinuar mas fuertes i sanos i rezyos, tomaremos el sol del enverano lo mas muncho posivle para estar positivos.
Invyernada buena, kon sanedad, keridos lektores…
