Es la primera vez ke esto meldando un livro de Isabel Allende, “La suma de los dias”. La otora eskrive la istoria de su vida i de su famiya en California. En meldando este livro, mos ambezamos komo una mujer kon personalidad fuerte i eksploziva, organiza sus relasiones kon todos los miembros de su famiya i de sus protejados ke eya los yama su “tribu”. Su kaza era siempre yena de djente, personajes literarios, ijos, inyetos, primos, amigos… Eya mos konta sus emosiones, sus dolores, sus sufriensas, sus viajes en el mundo para bushkar su inspirasion… Al lado de estos todos sentimientos, eya konta sus enkontros, sus krizas de parea, sus separasiones i sus konsolasiones. En mezmo tiempo es una istoria de amor, de un ombre i una mujer, maduros, ke pasaron munchas eskalas sin pedrer ni la pasion, ni el umor. Una famiya moderna, kon sus konfliktos, ma aunada i yena de amor.
En realidad en este livro Isabel kestiona su vida. Vemos los diferentes estados de la persona i los esforsos de una una mujer adulta para alkansar la madurez. Su vida la yevo al sufrimiento i la dolor i pedrer su ija fue una devastasion muy grande para eya. Isabel, komunika kon su ija, i mos va revelando sus eksperiensas en un stil majiko yeno de imajinasion i misterio. Eya konosio el travmatizmo dezde su chikes i fue ovligada de fuirse de su pais. Se instalaron primo en Venezuela i despues en California, ande enkontro su segundo marido Willie, un ombre siempre al lado de eya i en todas sus aventuras de la vida. El, kon su amor para eya, i pensando ke la union aze la fuersa, la rendia una mujer oroza i le ayudo a dar una filozofia de kontentarse de su vida.
“El sumo de los dias” es un livro ke se puede meldar kon fasilidad, en ambezando la filozofia de reunir la famiya moderna, kon todas sus adiksiones. Isabel, la famoza otora, mos ambeza a luchar i a amar la vida en todo modo de situasion.
