El Şalom es la sola gazeta en el mundo entero, ke tiene una oja en Ladino ke se publika kada semana.
Kuando Avram Leyon, el fondador de la gazeta Şalom, se izo hazino en Estambol en el anyo 1983, kijo serrar la gazeta, porke mas el no estava puediendo dar su enerjiya para kitarla kada semana. Ma los lideres de la komunidad judiya de Estambol, pensaron ke deven kontinuar a publikar el ‘Şalom’ kada semana.
Kon los esfuersos de Avram Leyon, ‘Şalom’ salyo kada semana desde el anyo 1947. Akeyos tiempos, la publikasion de las kuatro ojas de la gazeta eran enteramente en Ladino. Los muevos lideres de la gazeta pensaron ke la lingua del ‘Şalom’ kale ke seyga en turko, porke mas los judios turkos no estavan avlando el judeo-espanyol en kaza. Los judios turkos estavan avlando el turko en kaza, i se estavan ambezando en ingles i en fransez en las eskolas.
Empesando del anyo 1983, empesaron a publikar la gazeta en turko, ma la una oja kedo en Ladino.
Oy, el Şalom se publika kon vente ojas kada semana. En las grandes fiestas judiyas, la gazeta se publika kon vente i ocho ojas. ‘Şalom’ tiene un website, un kuento en Twitter, un kuento en Instagram i una oja en Facebook. Los eskritores volontarios eskriven artikolos kon diferentes temas, lo mas novelas sovre la komunidad judiya de Estambol, i los judios del mundo entero. Aparte de las novelas judiyas, ay diferentes artikolos sovre la ekonomiya, el spor, la teknolojiya, la pedagojiya, el arte, entrevistas ets. Aparte de esto, la gazeta publika un periodiko turko ‘Şalom Dergi’, i un suplemento ‘El Amaneser’ kada mez. ‘El Amaneser’ se produse por el Sentro Seferadi ke es un instituto bazado en el mizmo edifisio de la gazeta.
Fin oy en diya, la oja ke es eskrita en Ladino, fue la sola oja en el mundo entero ke se publika en Ladino kada semana.
Ay munchos esfuersos en los sentros akademikos del mundo sefaradi para ke esta lingua no se muera. Segun Rachel Bortnick, en el mundo entero, kedo mas poko de 100.000 a 150.000 avlantes de judeo-espanyol. Ma oy ay un entereso renuvelado en el mundo akademiko para estudiar esta lingua. Estos esfuersos mos estan dando esperansa por el Ladino, no komo una lingua ke se va avlar, ma komo un tema de estudio en las Universidades de Tufts, en los Estados Unidos, fina la Sorbone de Paris. Estas universidades estan ofriendo kursos en esta lingua.
Mansevos judios enteresados en los estudios espanyoles o ispanos, estan viendo una koneksion kon el judaizmo a traverso el Ladino.
Ladino no es solo una lingua, ma es una kultura entera kon las komidas, las kantikas, los kuentos, las dichas, los proverbos ke es el folklor sefaradi...
