La semana pasada eskrivi sovre un ombre, René Samuel Cassin, ke es renomado komo el padre de la Deklarasyon Universal de los Derechos Umanos. Entre semana, Su Eminensia, Rav Izak Haleva me bushko i me disho ke meldo lo ke eskrivi, ke le plazyo, ma… I kontinuyo eksplikandome ke en munchas partes de la Tora i Talmud se trata de los Derechos Umanos, i ke deviya a lo manko eskrivir dos u tres linyas sovre este sujeto para dar una sinyifikasyon mas Djudia. Lo tomi esto komo un dover i esta semana va eskrivir sovre esto.
Para empesar, el kuatren de los 10 komandamyentos: “Sesh dias vas a lavorar i vas a eskapar todos tus echos. Ma el syeten dia es Shabat, el dia de repozo del Todo Poderozo, no vas azer dingun lavoro, ni tu, ni tu ijo, ni tu ija, ni tus esklavos o esklavas, ni tus vakas, ni etranjeros ke estan serka de tus asentamyentos”. (Shemot 20:8-9) Este komandamyento se konsidera komo un primer derecho ofisyal de repozar en la istorya umana.
Una kestyon? Podemos dizir ke los derechos umanos empesaron kon la Tora? Si, la Tora es el manadero de nasimyento de las ideas modernas de igualdad. En su epoka, la Tora fue un livro revolusyonaryo de pensamyento sosyo-polítiko.
El pasuk “Va aver una sola ley por el sivdadino i el etranjero ke bive kon vozos” (Bereshit 12:49) es un siman emportante en la Tora sovre la igualdad entre los umanos, ke seya Djudyo o non-Djudyo. No mos olvidaremos afilu en los tyempos serkanos en syertos paizes dainda aviya diferensiyas en las leyes aplikadas a los blankos i los de kolores.
Vos kero atirar la atansyon sovre el fakto ke la Tora fue mandado o eskrito antes 3400 anyos. Dunke dizir ke la Tora era revolusyonaryo en su tyempo afilu i oy no es una ekzajerasyon.
La Tora tambyen ensiste en la proteksyon de los sosyalmente vulnerables. La repetisyon de las palavras “para protejar al etranjero" se mensyona mas de sinkuenta vezes en los sinko livros de la Tora, djunto kon el komandamyento de kudyar a los "guerfanos i las bivdas".
Porke esta preokupasyon por los ke no son komo mozotros, por los ke no tyenen una vida de famiya o los non-Djudios? La Tora mos da dos repuestas: una derivada de Adam i Havva, la otra de las raizes mizmas de la formasyon del puevlo Djudio.
Dos vezes en Bereshit, la Tora mos dize ke el Dyo kreo la umanidad a su propya kopya:
“I el Dyo kreyo el ombre a su propya kopya, a la kopya del Dyo” (Bereshit 1:27)
“Esto es el rejistro de la linea de Adam: kuando el Dyo kreo al ombre, lo izo a la semejensya del Dyo” (Bereshit 5:1)
Estos dos pasukes, amostra, en toda su maraviyoza diversidad, ke toda la umanidad kontyene una parte igual del Divino. Ke ermozo sinyo para amostrar ke toda la umanidad (no solo los Djudios, ma todo los umanos), es igual o deve de ser igual.
Por el sigundo punto, en la Tora, se ve el tema de Israel komo etranjeros, etranjeros en tyerras ajenas. Dyo le dize a Avraam ke sus ijos seran etranjeros en Ejipto, seran una minoridad i ke las leyes de la Tora deven aplikarsen a todas las partes de la sosyedad.
Otrun punto importante:
“No ofenderas al etranjero ni lo oprimaras, porke etranjeros erash en la tyerra de Ejipto. No maltrataras a dinguna bivda ni a dingun guerfano. Si los maltratas, va estar pronto kuando me yaman i va oyir sus yamada, i se va ensender mi kolora, i te va pasar kon mi espada, i vuestras mujeres kedaran bivdas i vuestros ijos guerfanos”. (Shemot 22:20-23)
Estamos vyendo ke Dyo, no solo esta ordenando ma esta amostrando ke va ser el garantor de la aplikasyon de estas leyes i si nesesaryo va kastigar.
No kero alargar estos egzempiyos sin fin i ke mi saviduriya es muy limitada en este sujeto, ma puedo dizir ke René Cassin se enspiro de sus raizes en aparejando la Deklarasyon Universal de los Derechos Umanos.
