Kon esta pandemiya entendimos ke la salud es la koza la mas emportante de la vida. No kale dizir “boshver” (no emporta) kon la salud. Kale ke mos miremos desde la chikes i la manseves, mizmo los chikos desrepozamientos i kurarlos. Porke ya vemos ke mizmo despues ke pasan los desrepozamientos prensipales, danyan los organes ke ya fueron afektados.
Siguro no kale ser hipohondriakos komo en el romanso de Moliere “El Hazino Imajinaryo”. No kale tomar kuras sin saver. Porke una kura ke viene bueno a uno, puede danyar a otro. Todas las kuras no son inosentes. Todas tienen efektos segundos. Kon esto vos kero kontar una konsejika ke me plaze muncho.
Aviya de ser un grupo de amigos de una edad entre 55 i 60 anyos. Estos se topavan muy frekuentamente i avlavan d’aki d’aya. Un diya se hazineyo un amigo i les estava kontando a los otros ke se fue al doktor i ke el doktor le disho ke ya kaliya ke viniera mas presto. El otro disho, si, kale ke mos vayamos al doktor a azer check-up. Ansina, todos estavan de akordo i estavan kontando lo ke les paso. Solo uno estava kayado. Le demandaron: Tu, no te vas al doktor? Disho akel amigo: No! Deke ke me vayga? No tengo nada, no me siento nada. Ansina ensupito se va al doktor? AAAAAAAA respondieron los otros. Al menos vate i azete una analiza de sangre.
Peki alora, disho este amigo i se fue a azerse analiza de la sangre. Kuando salyeron los rezultados, tomo el raporto i se lo yevo a un doktor. El doktor kontrolo el raporto i le disho: Mira todo ya esta muy bueno grasias al Dio, ma tienes un poko el kolesterol alto. Te va dar una kurika, lo tomas dos vezes al diya.
El ombre ampeso a tomar las kurikas ma despues ke paso un tiempo ampeso a tener dolor de tripa. Se fue al doktor, el doktor le disho ke estas kuras de kolesterol le danyo al ligado. Por esto le dyo unas kurikas mas, para el ligado. Yene despues de un tiempo ampeso a tener dolor en los intestinos. De muevo se fue al doktor, el doktor le dyo esta vez kuras para los intestinos. Esta kurika le danyo los rinyones. Ansina ansina no kedo organ ke no se bozdeyo. El poveretiko kedo sin fuersas, desho de komer, eskayo den diya en diya. I a la fin ya estava para murirse.
Yamo a toda su famiya al entorno de su kama i les disho. “Yo tengo un dalkavo dezeo. Despues ke me va murir, kero ke eskrivash ensima mi tomba. YO, ESTAVA BUENO; PARA ESTAR MIJOR, ESTO AKI”.
Siguro ke esta konsejika no kale ke mos deskoraje de irmos a los doktores. Esto era una eskiza umoristika para azervos sonriyir. Komo ya vos dishe mas ariva, la salud es muy emportante i komo yevamos los otomobiles o otras makinas a los kontroles, kale ke mos kontrolemos i mozotros regularmente. Komo dizimos kada noche de Shabat: LE HAYIM, A LA VIDA. Vida buena i yena de salud.
