Avraam muryo de edad de 175 anyos, kon vejes buena i arto de todo bueno. I fue enterrado por mano de Yitshak i Yishmael, sus ijos en Hevron en la meara ke merko de los ijos de Het.
Esav, el ijo grande de Ishak, todo su tyempo lo pasava en los kampos, la kontra de Yaakov, su ermano ke no pensava mas ke estudyar en la ley i en la sensya, i kaminava syempre kon plinismidad i buendad kon El Kriyador.
Un diya vino Esav del kampo, kansado i espantado, i muerto de ambre. Vyendo un gizado ke izo Yaakov, akeya ora para komer, le demando ke le dyera a komer de este gizado. Yaakov no refuzo i le izo su dezeo.
Entonses la Behora (mayoridad) era una koza muy emportante entre las famiyas onoradas. I ke es, despues de la muerte de un padre, se okupava el ijo mayor (Behor) del rijo de la kaza i de la edukasyon de la famiya. I todo deviya ser rejido por su komando. I vyendo Yaakov el negro komporto de su ermano ke no keriya saver mas ke ir de kampo en kampo, i kalkolando kon muncho razon ke una persona semejante no va ser kapavle de rijir la famiya kon onra i onestedad, le rogo a Esav ke le vendyera a el su Behora. Esav, de su parte, ke no konosiya ni apresyava la valor de la Behora no se desho muncho rogar, i en vista aksepto kon plazer venderle a su ermano, Yaakov la Behora, i estar mas libero. I se konvino presto en el presyo, i le dyo Yaakov lo ke dezeyo a su ermano. I kedaron de akordo. Yaakov se izo el Behor. Esav se fue a su echo sin tener ningun regreto, ni embarasarle por lo ke izo, syendo no teniya ninguna valor en sus ojos lo ke vendyo.
Yitshak se enrikesyo bastante en Gerar a tal grado ke los pelishtim se selaron muncho de el, i azian munchas kozas kontra su veluntad, i sovre todo en echo de los pozos. Ke todos los pozos ke kavakavan los mosos de los mosos de Yitshak se los tapavan los pelishtim. Ke mizmo Avimeleh, rey de Gerar por no pueder suportar su grandeza le disho a Yitshak ke se fuera de Gerar. Ma Avimeleh se topa muy kulpozo i lo yama de nuevo a Gerar.
