Esto viendo, meldando i oyendo ke los doktores del mundo entero, no estan de akordo kon los vaksenes. Unos dizen ke kale vaksinarmos i otros dizen ke no. Eyos lo dizen, ke dainda no se save nada sovre este virus Covid-19 i tambien siguro sovre la salvasyon. Komo se kura o komo se salva de este virus?
La verdad es ke i los ke se vaksinaron i los ke no se vaksinaron son sujetos de testes. Kuando los sientifikos vieron esta dezgrasya ke kuvrio el mundo entero, siguro ke se alarmaron i para salvarmos se enserraron en los laboratuares i toparon vaksenes. La China, la Alemanya i los Estados Unidos toparon vaksenes diferentes. Ampesaron a la produksyon i a venderlos a todos los payizes. A lo manko, si se eskapa en munchos payizes, mos salvamos de esta bela. Komo dishe mas ariva dainda estamos aziendo testes.
Los ke estan kontra del vaksino, de una parte les do razon por ke no savemos despues de unos kuantos anyos kualo mos puede afitar? De otra parte digo, i si esto sera la salvasyon? Me akodro ke kuando yo era chika aviya una epidemiya de Polio. No se saviya de ande se estavan apegando las kriyaturas. Por esto mi mama no mos desho akel enverano entrar a la mar. En supito oyimos ke un Dr. Salk kito un vaksen kontra esta hazinura i todos ampesaron a vaksinarsen. Mozotros estavamos de idea de asperar. Grasyas al Dio ke asperimos, porke se oyo ke munchas kriyaturas tuvieron Polio por modo de este vaksen. Otro egzemplo era la kura Thalidomide. Esta kura la estavan dando a las prenyadas para ke tengan parto kolay. I munchas munchas prenyadas ampesaron a tomar esta kura. Despues ke paryeron se vido la dezgrasya. Ampesaron a parir kriyaturas sin brasos o sin pachas. I a la fin entendyeron ke era achakes de esta kura.
Agora vendremos a la otra parte de la medalya. A los ke se vaksinaron. I yo me vaksini. Vos avli del vaksen del Dr. Salk. Despues ke vieron ke este vaksen teniya efektos segundaryos, bushkaron mas i developaron otro vaksen sin efektos i ke se empleya asta agora, el vaksen del Dr. Sabine. Se mete dos gotas de esta kura ensima de un poko de asukar i se englute. I esto es todo. Ma kaliya testar. I komo se iva testar? Siguro ensima de las personas. Ya uvo unas kuantas viktimas malorozamente, ma se dize ke eyos salvaron el resto de las kriyaturas ke nasyeron en el mundo.
Yo digo ke kale vaksinarmos. I lo digo en ensistiendo. No mos olvidaremos ke oy en diya si no egzisten mas la difteriya, la virguela, la kolera, el tetanos, la kokluche, la tuberkuloz i munchas mas hazinuras ke mataron personas en masas, es grasias a estos vaksenes.
Siguro ke no kale echarmos a la anchor por ke mos vaksinimos. Siempre kale metermos las maskas, lavarmos las manos frekuentamente, no kale entrar en lugares ande ay muncha djente, i kale tener un poko de distansya.
Dias saludozos a todos.
