Hayim Behmuaras
La guerta Spiro, por los ke moravan i dainda moran en Şişli, es una memorya maraviyoza. Anyos antes, aviya en Şişli una fabrika de bira, ke se yamava Bomonti Bira Fabrikası. I esta fabrika teniya una guerta en Şişli, ke se yamava SPIRO, i ke estava enfrente del semeteryo de los Djudyo Italyanos. Agora en el lugar de la guerta Spiro, ay un AVM ke se yama 1000 A.
Un rituel grande era enverano la guerta Spiro. Era muy grande la guerta, en medyo teniya una pisina, aryento de la pisina aviya pishkados, i ranas. Las ranas estavan enriva de las ojas grandes.
El anyo era 1966 i dainda teniya yo 10 anyos. La guerta era de la fabrika ke aziya bira, i aya aryento de las botas vendiyan bira. Las botas eran de tavla, i eran un poko mojadas por esto teniya una golor spesial. Me plaziya muncho esta golor. Aviya tambien un mupak grande ande aziyan patatas fritas, kyoftes en la lumbre, i kokorech (entestinos de haya) en la lumbre. Kada djueves la noche mi madre kon mi padre i yo, aya fikso en la guerta kon los amigos suyos.
Kada uno trayiya de su kaza una koza, ken dolmas yalandjis, ken albondigas de prasa, ken trayiya salat rusa, i de aya tomavan patatikas fritas, kyoftikas, i kokorech enriva kon oregano, pimyenta, i sal iiiiiiii 2-3 botas de biras. Las botas eran grandes i chikas, i se avriyan kon seremoniya. En primero metiyan un pye de fyerro, i asentavan la bota enriva del pye, despues teniyan un tokmak de tavla ke kon esto avriyan un burako en la bota, i presto, presto al burako metiyan una fuente de tavla, i empesavan a inchir las kupas.
Las kupas de bira eran diferentes, grandes, ondas, i un poko redondas.
Eramos 10 personas grandes i mozotros los chikos kaji 5.
Deke djueves? Porke las madres dia entero lavoravan, gizavan por la noche de Shabat, i por esto a las mujeres aziyan un djesto. Los padres viniyan a las 6-6.30 fin a las 11.00 de la noche beviyan, kantavan, estavan todos muy orozos. I mozos koryeee babam koryeee, i en gritandooooo!
La guerta era yena de Djudyos. Enverano kada semana era este modo, de un dia antes empesavamos a emosyonarmos.
Los grandes eran komo una famiya, komo un punyo. I mozotros mos ambezimos de estos fiksos la amistad, i el amigavle komo ermanos.
La guerta SPİRO era un amor para los Şişlilis. Grasias al Dio ke vimos estos dias ermozos...
