La mueva seria de Netflix, Kulüp, atiro grande atansion en Turkiya.
El tema prensipal de la seria es la istoria de Matilda i su anturaje. Matilda rankontra su ija Rashel en el Klub. Las dos no se konosen. Matilda tuvo menester de deshar su ija kuando era un bebe porke deviya entrar en prezo. Rashel se engrandesio en un orfelinato. Para Rashel, konoser a su madre fue una surpriza muy grande porke le aviyan dicho ke su madre se aviya murido. Matilda aksepta el lavoro de mosa en el klub para pueder salvar su ija i bivir endjuntos kon eya.
Para Matilda, su relasion kon su ija Rashel es komplikada en el empesijo ma mas despues, madre i ija no pueden estar leshos una de la otra.
La istoria de la seria tiene munchas temas universales, komo la famiya, la amistad, la amor, la politika i la relijion.
El filmo esta pasando en Beyoğlu en la dekada de 1950’s. Estamos rankontrando personajes del puevlo sefaradi en Estambol. Estamos viendo la vida nokturna de Beyoğlu en los 50’s, i el filmo mos esta yevando al publiko de akel tiempo kon las vistimyentas, dekorasion i muzika ke esta reflektando akeya perioda.
La koneksion judia, los personajes ke estan avlando Ladino, los sitios ande bivyeron muestras famiyas, la forma ke se vestian, ke se kuafavan, las sinagogas, las viejas otos amerikanas, el lugar ande nasimos la djente de mi edad: estas shenas me yevaron al pasado. Muestras tradisiones, los objetos de muestra vida ritual, las reglas ke amostran muestra disiplina familiar, las entonasiones djustas de los diskorsos en ladino, los komentarios de los personajes judios; estos detalyos no me vinieron del todo ajenos. Mezmo las orasiones rituales relijiozas estan resitadas de una manera komprensivle. Asta los platos de komer fueron eskojidos segun la kultura sefaradi.
Es la primera vez ke en un filmo turko, la vida i los personajes judios estan reflektados de una manera korekta, sin burlandosen, sin antisemitizmo.
Kale felisitar los ke izieron esta seria porke es por la primera vez ke la vida istorika de los judios turkos esta reflektada de una manera tan realista, sinsera i kon kalidad. En el filmo, estan tambien mensionando kómo los judios ke no pudieron pagar el impuesto Varlık fueron embiyados a Ashkale.
En avlando entre eyos, los judios turkos estan empleyando el biervo ‘vedre’ para los turkos muzulmanes, i la palavra ‘medina’ por Israel. Deve de ser para ke la seria seyga mas orijinal i realista.
Esto seguro ke esta seria de Netfix va ser muy popular en los merkados etranjeros. La istoria de una epoka esta kontada i reflektada de una manera ke va tokar los korasones de los judios del mundo entero.
Un grupo de sesenta personas de muestra komunidad lavoraron noche i dia para ke esta seria seyga realista i korekta. Munchos de eyos tomaron rolos chikos en el filmo. Kreygo ke grasyas a eyos, esta seria fue tan reushida. Los estamos felisitando por sus lavoro duro, por sus eksito, i les estamos ogurando reushita en sus lavoros futuros.
