Ya esto kaje sigura ke todos van a eskrivir sovre este filmo ke vimos en Netflix “El Klub”. Ma yene vos kero mensyonar un chiko detalyo ke me empresyono muncho, sin darvos munchos endisios sovre el filmo. Porke no kero ser komo una ke dize la fin, al ke no vido el filmo: “El ke mato es el servidor”.
En el empesijo del filmo vemos a Matilda ke esta en la prezyon. En la radyo estan dizyendo ke salyo un perdon. La vemos a Matilda ke esta asendyendo las kandelas de Shabat, dizyendo la beraha de las kandelas, sin dingun yerro kon un aksento djusto. Despues se va a su meza. En su meza (deke estava komiendo aparte de las otras?) vemos ke destapo la komida ke estava tapada kon un taponiko brodado. La komida era lentejas (siguro en la prizyon no iva komer pishkado kon guevo i limon, i rulikos de berenjena) i dos pedasos de pan, ke es la uzansa de amotsi. Malgrado ke eran lentejas, ke los judios nunka no komen lentejas en Shabat, les dyo onor. Onor de Shabat.
Esto mos amostra ke Matilda ke kedo 17 anyos en la prizyon, no desho su fey. No se dezvacheyo de asender las kandelas i santifikar el Shabat.
Para las komunitas komo la muestra ke esta entegrada a la grande populasyon, este modo de rekuerdos del pasado son muy emportantes i presyozos. Kon este filmo los aedados se akodran i los mas mansevos se enforman de estos evenimyentos ke pasaron. Tanbien estas ovras arefreskan la memorya de la grande komunita, ademas los mansevos ke no bivieron en akeyos tiempos. Por egzemplo konosko a munchas personas, de kulturas altas ke no tienen oyido el Olokosto.
Ke ermozo esta de ver la vida de muestra chikes i los lugares ande mos engrandesimos.
