Komo konsultante en la seria "El Klub" en Netflix, ke esta teniendo un sukseso muy alto en el mundo entero, yo ize las sigientes kozas para ke se aga un filmo autentiko i de alta kalidad:
Preparasion de una kaza judía tradisional
Kandelares de Shabat - Mezuza — Kuviertas ke se metiya enriva de la radio- Preparasion de la meza de Shabat
El uzo de la kipá de ombres durante la orasión en kaza i en la Sinagoga,
Mushuares/Ridas para mujeres Kazadas.
El ekipo estava bien preparado para este echo.
Si tuviera ke dar un egzemplo, de Israel merkaron 50 kipas muevas, les propozi de tomarlas todas i darlas a una Sinagoga i trokarlas kon las viejas, para ke pareska ke son tomadas de kada yahid su kipa personal.
Les espliki la eleksyon de La Mezuza, ke se mete en kada kamareta (aparte del banyo), i les ize preparar en sus propios atelyes, lo mizmo ke se topava en las kazas antiguas.
Los tratamientos ke se deviya merkar para la nochada de espozorio de Rashel.
Los tratamientos de la nochada de la fiesta de Purim. Mavlachas de dulse espesiales.
Seleksyon de frutas sekas i freskas en la Sinagoga de Haydar Pasha (Hemdat Yisrael) para el festival Tu-bishvat.
Se detalyó todo, ken devíya asentarse ande i al lado de ken, ke kolor de mantel meter en la meza, komo se kreava una mezuzá según la époka, preparar los platos de komer de la gastronomia sefardí.
Para kada platform del filmo, topi personas ke podrían avlar ladino.
Entre eyos aviya viejos-viejas, adultos-adultas, mansevos i chikitikos.
76 personas partisiparon en esta serie.
La persona ke se vido en una travada, no pudo venir a otra. Aparte de algunas eksepsiones.
Todos estos partisipantes también fueron filmados i enrejistrados después, para tener las bozes de vokalizasiónes en Judeo-Espanyol (lo ke yamamos Rabarba en el linguaje del teatro, ke es bozes ke se oyen, un sorte de bruido en un lugar).
Los lugares para avlar ladino fueron eskojidos kon grande atansyon por parte los direktores.
Se lavoro en los diskursos en ladino, ke se tradusyeron durante el eskrito, kon las aktoras en el plató, en ke pozisyon i kómo devían de prononsyar sus dialogos antes de filmarsen.
En desparte de esto, les mostri komo dizir las orasiones komo se deven de dizir una a una kon más sinseridad.
La diksión de la aktora no devia ser ajena a la lingua.
Al final de todas estas bozes ke se preparo en ladino, fui a IMAJ Studios i kontroli los subtítulos ke se traduzieron al turko de todos los avlantes del ladino. Aregli los ke no eran djustos i los ke no se aviyan metidos.
En primer lugar, me gustaría dizir ke la seleksiyón de los lugares, la dekorasión i los aksesuares fueron kreados de manera responsavle i kon muncha atansyon. Puedo dizir ke enkontri todo pronto. En primero m’enkanti de ver ke todo estava pronto komo se deve.
Una gran mákina de pasensia i enerjíya.
S’enderecharon algunos detayes ke no se entendiya en el senario.
La produksión, el direktor i el ekipo pasaron muncho tiempo tratando de enkontrar lo djusto para todo.
Esto se vido en el direktor de fotografía i en su ekipo, los direktores i ekipos de luz i sonido, el ekipo de dekorasión, vistimientas i aksesuares.
Estuve muy sorprendido de ver la enerjía de los subdirektores kon la de los direktores. Estava komo si se aviyan trokado en uno, unidos kon el Direktor i komo un mekanizmo entre sus meoyos estava aziendo un solo ekipo de sus pensamientos.
Aparte de todo esto, tambien devo mensionar ke todas las gravasiones fueron tomadas por un muy grande ekipo durante un tiempo de Pandemia. Testes de PCR i análizes de sangre kon rezultados en 15 minutos todos los días, trokamiento de maskas kada media ora. En kurto, la ijyena fue kompleta. Esto inkluyo las komidas. Se inkluyó un menú vejetariano para ke mozotros, los judios ke miran kasher pudieran komer.
Esto muy kontente i orgulyozo de aver tomado parte en este proyekto sin la filozofia muestra de "Kayades"! Esto fue una koza a la kual no eramos auzados asta oy. En el empesijo, la vedra dizirvos, tuve un poko de espanto i de stres. Es ke la kavesa me iva entrar en bela? Ama Silvyo Ovadya me aviya rekomendado para esto, alora no devia de ser koza mala ni de espantar! Yene devia de azer atansion. Teniamos unos prejuisyos en mirando las serias pasadas. Grasias a Dio, todo salio muy bueno!
