Yaakov mando mesajeros onde Esav, su ermano kon unas palavras muy tyernas, dandole a saver las fuertes fatigas ke tuvo en sus 20 anyos de sirvisyo onde Lavan, i ke agora lo rengrasyo El Kriyador i es patron de kualker koza. I le roga ke se olvide todo lo pasado i ke seya su amigo por endelantre, i komo estas palavras, ke azen ablandar el korason mas duro.
Los mesajeros izyeron el komando de Yaakov i fueron a punte onde Esav i le disheron las palavras de Yaakov. Esav no kijo ni menos sintir sus palavras, i se ensenyo mas muncho kon su ermano.
Sintyendo Yaakov esto, se apronto para todo. En primero rogo al Dyo ke este en su ayuda sigun se lo prometyo, i ke lo eskape de Esav, su ermano. I despues divizo todo su fonsado en dos partes. I aparejo un prezente grande de ovejas i kuatropeas por darle a su ermano, i lo reglo de buena manera a ke se le inchera el ojo de Esav. La medya noche izo pasar todo su fonsado a la otra parte del Rio Yabok i a la manyana kontinuo su kamino asta serka el medyo diya. Vé Yaakov de efrente a Esav kon su kompanyia ke vyenen a su enkontro, alora se apresuro Yaakov i paso delantre todo su fonsado i se omiyo i se enkorvo delantre de su ermano kon muncho respekto.
Entonses se troko la idea de Esav, i se ablando su korason. I koryo al enkontro de Yaakov i lo abraso i lo bezo, i yoraron todos de alegriya i enprezento Yaakov todo akel dono ke aparejo par el i toda su konpanya les dyo munchos regalos i plata i oro. En akel mismo diya torno Esav a su kamino, i Yaakov kontinuo su kamino para la tyerra de Kenaan i arivo a el lugar nombrado Sukot ke es serka del Yarden i fraguo ayi kaza para morar i lugares para su ganado.
