Entre todos los ijos de Yaakov, el mas savyo i entelijente de todos era Yosef, el primer ijo de Rahel. I su padre, seya por su entelijensya, seya porke era regalado de su madre lo amava i lo akerensyava del fondo de su korason, mas ke a todos sus ermanos. I en sinyal de su amistad le izo una kamiza de una ropa muy fina i muy ermoza, lo ke no izo a ninguno de sus ijos.
Vyendo esto, los ermanos de Yosef entraron en selo kon Yosef, i lo aboresyaron muy muncho. Yosef, aun ke era muy savyo, i entelijente, syendo ke era muy mansevo, se konteniya un poko sovre sus ermanos. Vyendo de una parte ke el era mas entelijente ke eyos, i de otra parte la amistad ke le mostrava su padre mas ke todos sus ermanos.
En este enterval se sonyo Yosef dos suenyos, los kualos demonstravan ke el teniya ke ser sinyor i podestador de sus ermanos, i el no se travo de kontarlo a su padre i a sus ermanos. Este konporto de Yosef no izo mas ke pujar el selo i la aboresyon de sus ermanos kon el.
Un diya estando los ijos de Yaakov paseando sus ovejas en Shehem, komo sus uzo, kedaron mas tadre en el kampo, i no vinyeron a kaza en su ora. Yaakov pensando no seya ke uvo de nuevo alguna rebuelta kon la djente de Shehem, le dize a Yosef ke vaya a traerle enformasyones.
Yosef aunke ya saviya ke sus ermanos lo aboresiyan, no refuzo el komando de su padre i se fue para Shehem. Sus ermanos ke lo vyeron de leshos vinir solo onde eyos, les pujo mas akeya ora el selo i la aboresyon i se determinaron de kitarlo del mundo.
Sovre el konsejo de Reuven, uno de los ermanos, de no matarlo kon sus manos, lo echaron a un pozo ondo i vaziyo ke aviya en akel kampo, despues de deznudarlo i kitarle la kamiza fina ke le izo su padre, en sinyal de su amistad. I todos los yoros i rogativas de Yosef a sus ermanos fue sin ningun provecho. Estando Yosef en el pozo, pasa por ayi merkaderes ke vinian de Midyan i los ermanos lo venden a Yosef, i lo yevan a el Ejipto.
