No vos espantesh! Esta semana no vos va avlar de la Seria de Filmos Kulup i de los reportajes ke se estan realizando sovre este sujeto. Ni vos va avlar de las ekspozisiones ke se estan realizando en el Muzeo Djudio. Noche de alhad (el 21) arekojimos la ekspozision ke realizimos en la Sinagoga de Zulfaris: “La Identitad Djudia engravada en las piedras”. Vamos a embiyar esta ekspozisyon a İzmir. Keren ke se ekspoze en İzmir. La vamos a dar despues ke el livro va ser publikado. I despues ke arekojimos la ekspozision, estamos embiyando las fotografias de İzzet Keribar sovre las Sinagogas de Turkiya a Edirne ande van a ser ekspozadas en la Grande Sinagoga de Edirne. La avyertura se va realizar amanyana el diya de la liberasion de Edirne. Ke koensidensia. Mizmo el Presidente de la Munisipalidad, el Sinyor Recep Gürkan me bushko envitandome a la resepsion ke se va realizar esta noche.
Noche de Alhad es la primera noche de Hanuka i el Rabino Nafi Haleva, komo el anyo pasado esta organizando una seremoniya ande todas las sivdades, todos los kuarteres kon sus sinagogas i las ovras i enstitusyones de muestra komunidad van a partisipar. Va ser una seremoniya enteresante ke se va realizar kon Zoom. Ya savesh ke es sinko o sesh anyos antes ke por la primera vez se selebro en Ortaköy en la kaye asendyendo las kandelas de la Hanukiya. Los dos anyos sigientes se selebro de muevo en Ortaköy ma en un lugar mas protejado. Ya la asendimos debasho de la Kula, i el anyo pasado en el Park de Fenerbahçe. No me esto akodrando si asendimos las kandelas en un otro lugar ma este anyo se va realizar el 5 de desembre en Balat i Haskoy en las dos vandas del Kuerno de Oro. Los dos presidentes de las munisipalidades de Fatih i Beyoğlu ke son responsavles de Balat i Hasköy van a partisipar a esta seremoniya. Los Pasharos Sefaradis van a dar un konsyerto de muzika de kantikas Sefardis esta mizma noche.
El 2 de desembre mos vamos a ir a Kilis. Sivdad vizina de Gaziantep, serka de la frontiera Siriana. Ya savemos ke egzistiya una komunidad asta los anyos 60 en esta sivdad. La Direksion de las Fondasyones restoro esta sinagoga. Estamos vyendo en el livro de las Sinagogas de Turkiya la ermozura del edifisio de las fotografias de İzzet Keribar. Dos anyos antes kuando mos fuimos a Gaziantep malorozamente muestro avion tuvo un retar de kuatro o sinko oras. I no pude vijitar este edifisio. Es despues de dos anyos ke va poder vijitarla. I vamos asender las sinko kandelas de la Hanukiya. Hag Hanukah Sameah.
