Las sivilizasyones de Sumer i de Misrayim, se alimentavan de observasyones del syelo. Eyos se bazavan sovre los evenementos del syelo para saver el futuro de los del mundo. El sol, la luna i las estreyas fueron el sentro de los estudyos sovre la astronomiya i tambien reprezentaron los dyozes en diferentes sivilizasyones. Israel siendo el vizino mas chiko, se empresto estos mitos i empeso a gravarlos kon símbolos en las rokas del dezyerto Negev; igual komo los primeros umanos lo izyeron antes de konoser la eskritura.
Algunas de estas figuras en las rokas simbolizan los kuatro diyas importantes del anyo komo los diyas del ekinokso i del solstiso; es dizir los diyas del trokamyento de lugar del sol, komo los 21 del Marso, del Junio, del Disembre el 23 del Septiembre. Estos kuatro diyas del anyo eran muy importantes porke eran diyas de peregrinasyon a los lugares konsiderados komo sakrados. En estos diyas selebravan fiestas komo el empesijo del anyo muevo, la kosecha (Hasat), la fertilidad i probablemente aziyan figuras en las rokas para komemorar i transmitir a los dores muevos sus saviduriyas i konosimyentos.
El arte de figuras en la roka no es un arte fino, ma es la mas vieja lingua para transmitir las emosyones i la saviduriya de akeyas personas ke bivian en estos lugares. Lo mas de estas figuras refletan el siklo de la luna o de las planetas o del sol i tienen relasyon kon la astronomiya. La adorasyon del syelo se ve muy bien en las eskavasyones arkeolojikas komo en una tumba. Las figuras, aunke paresen a los desenyos echos por kriyaturas, o ke paresen ke fueron echas kon adjile, para salir de hova, el kontenido es muncho mas profundo porke refletan la kreyensia del artisto.
El umano syempre fue fasinado mirando al syelo. Las estreyas i las planetas syempre le ayudaron a formar un kalendaryo. Despues de munchas observasyones, uno puediya dizir lo ke iva afitar, lo ke iva ser el ritmo de la vida, de la agrikultura i de las fiestas relijyozas. La luna fue la koza ke se konosiya la mijor en la observasyon del syelo i klaro una razon para estableser el kalendaryo.
Lo mas de las figuras de las rokas del Negev, mos ensenyan el viyaje de la Luna ke dura kada mes 28 diyas komo se ve en la kopya del guzano kon 28 pyes.
El savyo aedado ke representa el dyo Luna esta en otra roka del Negev debasho de otro numero 28, muy importante, ke es el siklo de la Luna. Así kaji en toda Mezopotamya, i Medyo Oriyente, la base del kalendaryo fue syempre la Luna ke forma el anyo lunar de 354 diyas en komparasyon kon el anyo solar ke tyene 365 diyas. Es por esto ke muestras fiestas no vienen syempre en la misma data i es por esto ke muestros padres adjustaron un mez en un siklo de 19 anyos de kada 3 o 2 anyos. Es dizir: 3+3+2+3+3+3+2=19.
Otra figura del arte de roka del Negev es la karucha de 12 rayos ke reprezentan los 12 mezes.
El arte de la roka en el Negev no se limita solo a la astronomiya, tambien trata de la fertilitad ke djugo un grande rolo en las sivilizasyones de la antikuedad. La boda sakrada del Padre Syelo kon la Madre Tyerra, fue
