Kualo es katarakt? Katarakt es ke la lens ke tenemos aryentro del ojo, perye su transparesya. No vemos mas, kuando la transparensya se pyedre por entero. Dizimos tanbien le abasho perde.
Teniyamos una vizina, Madam Korin. La povereta teniya antojos godros godros komo el dip de un bokal de vidro. Malgrado esto no puediya ver bueno.
Mos estava kontando ke en el empesijo se le aviya ampesado a aminguar la vista i se le aviya ampesado a tener un velo blanko ensima de los ojos. Siguro se fue al doktor de ojos. El doktor le aviya dicho ke teniya katarakt i ke kaliya operarla. Ma kaliya asperar un sierto tiempo para ke este velo se le engodre. Aspero aspero mezes Madam Korin, asta ke se estava keshando ke no estava mas puedyendo ver las karas. La operaron de los ojos en kitando este “perde” de ensima del ojo i siguro ke, komo el ojo kedo sin lens, le metiyan antojos kon alto numero. Antes los antojos eran de vidro halis i eran muy pezgados. No eran del todo konfortavle. Esto ke vos konti era kaje 40 anyos antes.
Agora vos vash a enkantar de la mueva teknolojiya. De diya en diya esta adelantando la medisina. En todos los dominyos medikales, los sientifikos van bushkando remedios mas perfektos.
En muestros diyas, desde ke se apersiven ke la persona tiene empesijo de katarakt, no asperan mas muncho tiempo. Desidan de azer una operasyon. Komo lo azen? Vos va kontar los ke vide en el internet.
En primero echan damlas para endormeser i dezenfektar el ojo. Despues kortan un pasiko del kenar del iris ke es la partida ke mos da la kolor del ojo i por aya se entra i se kita muestro lens de aryentro del ojo kon unos instrumentos ekstra finos i se mete un lens muevo. Kon esto se ve todo mas briyante i mas klaro.
Ke azer, kuando los anyos pasan mizmo las makinas se enviejesen. Ansina i mozotros pasamos el tiempo en enderechando las partidas vyejas. Lo emportante es de arogar ke tengamos chikas reparasyones.
