Dos anyos antes un diya de Hanuka, mos fuimos a Gaziantep, sivdad serka de la Siria ande egzistiya una komunidad Djudia asta los anyos 70. Ma despues todos vinyeron a Estanbol o se fueron a Israel o otros payizes. Reelmente fue una seremoniya yena d’emosyon. En estos mismos diyas de 2019, la Direksyon de las Fondasyones - Vakıflar Genel Müdürlüğü - termino la restorasyon de la Sinagoga de Kilis, ke era un kazal serka de Gaziantep. A 70 o 80 kilometros de Gaziantep. Oy es una sivdad de muestro payis ande una grande partida de Sirianos ke se fuyeron de la Siria estan morando aya. Dizen ke mas muncho de la mitad de la populasion son Sirianos. Ya savemos ke los ke estavan morando en Kilis en primero se fueron a Antep i despues a Estanbol o otro payizes. Es djusto ke no era muy fasil de bivir en las sivdades de oryente de la Turkiya. Ma oy el mundo i muestro payis esta mas global. La djente no konose mas todos los ke moran en la mahalle.
Lavorando sovre un proyekto telefoni a Murat Şirem, ke no tyene ni 70 anyos oy en diya i me konto kada lugar i kada pyedra de la maalle ande biviya en Kilis, i todo sovre la sinagoga. La semana pasada le telefoni dizyendo ke mos vamos a ir a Kilis i me disho ke me va responder. Ma kreo kon estas kondisyones de Korona dyo karar de no vinir malgrado ke keriya muncho. Ma mos estamos indo kon un grupo de Gazianteplis ke van a estar tres diyas en esta rejion vijitando Kilis, Gaziantep i despues Urfa. Urfa es la sivdad ande los Djudios fueron ovligados de abandonar sus vidas despues de un masakro terivle. Es djusto ke muy poka djente save este evenimyente ke afito anyos antes. Kreo ke es el Sinyor Murat Nihmat ke estra organizando este viyaje. I komo es una persona ke se enteresa en la sivdad ande nasyo, en Gaziantep, todos tyenen el mazal de vijitar lugares enteresantes.
En el livro ke publikimos sovre las Sinagogas de muestro payis İzzet Keribar fotografio la Sinagoga restorada por la Direksyon de las Fondasyones. Tuve la posibilitad de konoser a una arkitekta ke izo todos los planos de restorasyon de la sinagoga de Kilis. Mizmo dimos karar de realizar un evenimyento en el muzeo kon İzzet Keribar. Las fotos de Keribar kon la restorasyon de esta arkitekta. Ma malorozamente no tuvimos la posibilitad. Espero de ver esta arkitekta amanyana en Kilis.
La Direksyon de las fondasyones reelmente estan azyendo un echo muy emportante restorando syertas sinagogas, mizmo syertas eglisias. Esto todo es la rikeza de muestro payis.
