El grupo judio, a Kapella, ke el anyo pasado aviya aparejado un muzikal de Pesah, i ke aviya tenido muncho sukse, esta vez aparejo un potpuri de uno de los mijores muzikales: “West Side Story." El maraviyozo muzikal i el filmo del anyo 1961, eskrito por Steven Sondheim i Leonard Bernstein, fue arrebivido por Steven Spielberg kon un muevo senario del eksperto de teatro judio, Tony Kushner, ke va entrar a vizyon en los sinemas en disembre.
Para selebrar el filmo, el grupo de muzika Six13 tomo kuatro de las kantikas de las mas inolvidables del muzikal i las konvertio segun la istoria de Hanuka. El potpuri esta ampesando kon una version de "Amerika" ke se konvertio a "En Hanuka’’, el festival de las luzes. Komo Amerika es la tierra de la oportunidad, Hanuka tambien es la oportunidad de las fiestas judias. En la parodiya, el grupo de muzika esta nombrando todas las kozas ke egzisten en la tradision de Hannukah.
La kantika famoza del muzikal "María", se transformo en "Menorah". Maria i Menorah, i las dos estan briyando. El "ofisial Krupke" se convertio al ‘‘rey Antiochus". (El rey Antiochus governo el antiguo Israel durante la epoka de los Makabeos i es el karakter malo de la istoria de Hanuka). La romantika kantika "Tonight" se konvertio en "Eight Nights". La kantika orijinal mezmo esta mensionando los milagros!
El grupo muzikal bazado en la sivdad de New York aprovecho su entorno lokal para azer este video, ke prezenta senas rekreadas i koreografias del muzikal. Ensendieron una menora en Central Park.
Alegre Hanuka a todos los judios del mundo.
